ხელოვნებას, კულტურას არაერთი მიმართულება აქვს. სხვადასხვა ადამიანები სხვადასხვა განხრით ინტერესდებიან და ამ მხრივ ვითარდებიან. გარდა ამისა, ჩვენ შესაძლოა, ხშირად გავიგოთ ისეთი განხრის შესახებ, რის მიმართაც იქამდე ინფორმაცია არ გვქონია.
მაკა ლეჟავა ხის, ძაფისა და ლურსმნის მეშვეობით ქმნის ნამუშევრებს. აღნიშნული ძალიან ლამაზია, თუმცა, გარკვეულ სირთულეებთან არის დაკავშირებული მუშაობის პროცესი.
“თბილისი თაიმსს” მაკა ლეჟავა თავად ესაუბრა.
ნამუშევრებს ხისგან, ძაფისა და ლურსმნისგან ქმნით – დეტალურად, რას ამზადებთ?
ნამუშევრები შესრულებულია ხეზე ლურსმნებით და ძაფებით, რასაც სიმების ხელოვნებას (art sting) უწოდებენ. ძირითადი მონახაზი კეთდება ლურსმნების საშუალებით და ხდება ძაფებით ფიგურების გამოყვანა. ნებისმიერი რამის დამზადება შეიძლება – პეიზაჟი, პორტრეტი, ნატურმორტი, თუმცა, კონტურული მონახაზები უფრო ადვილი შესასრულებელია. არსებობენ ამ ხელოვნების მიმდევრები, რომლებსაც გადმოტანილი აქვთ დაფაზე არაერთი ცნობილი მხატვრის ნახატები, როგორიცაა მოდილიანი, ვან გოგი, ლეონარდო და ვინჩი. მე ახალბედა ვარ და, ძირითადად, კონტურებზე ვმუშაობ, თუმცა, ვფიქრობ, რომ მომავალში შევძლებ მსგავსი სირთულის ნამუშევრების შესრულებას.
რა სირთულეებთან არის დაკავშირებული თქვენი საქმიანობა?
სირთულეს რაც შეეხება, ეს არის შექმნის პროცესით გამოწვეული ხმაური, რომელსაც არაერთხელ შეუწუხებია მეზობლები, თუმცა, როდესაც იგებენ ჩემი ჰობის შესახებ, ყველას ძალიან მოსწონს და დათმობზეც მოდიან.
თემატურად, ნებისმიერი მიმართულებით ამზადებთ?
ნებისმიერი თემატიკა მისაღებია, რადგან მრავალფეროვნება უფრო კარგი და საინტერესოა მუშაობის პროცესში.
ბევრია ჩვენს ქვეყანაში ისეთი ადამიანი, რომელიც ნამუშევრების დასამზადებლად სწორედ ძაფსა და ლურსმანს იყენებს?
საქართველოში ხელოვნების ეს დარგი დიდი პოპულარობით არ გამოირჩევა, თუმცა, რამდენიმე ადამიანი ვიცი, ვინც ამ მიმართულებით მუშაობს და ცდილობს, განვითარდეს.
გარდა ამისა, კიდევ რას საქმიანობთ?
გარდა ამისა, მიყვარს ყაისნაღით ქსოვა, ვამზადებ სასაჩუქრე ნაკრებს და სათამაშოებს პატარებისთვის, რომელიც ასევე დიდი პოპულარობით სარგებლობს. დაინტერესების შემთხვევაში მანუშევრების ნახვა შესაძლებელია feosbook- გვერდზე – „წიპუნია.TsiPuNia”
მასალა მოამზადა : მარიამ ტიელიძემ
