ჩვენს პლანეტაზე ქვეყნები ერთმანეთისგან ძალიან განსხვავდებიან – განსხვავდებიან არაერთი მიმართულებით. მათ შორის, ერთერთი განსაკუთრებული სფერო გახლავთ ,კულტურა და ხელოვნება. თითოეულ სახელმწიფოს ამ მხრივ აქვს საკუთარი წარსული, ისტორია და მიზეზები, რის გამოც ერთი განსხვავდება მეორისგან.
არცთუ ისე იშვიათად, შესაძლოა, არც კი გვქონდეს პასუხი კითხვაზე – რატომ მოგვწონს ამა თუ იმ სახელმწიფოს კულტურული მახასიათებელი.
ერთერთი ქვეყანა, რომელსაც აშკარად გამორჩეული კულტურა აქვს, იაპონიაა. შეიძლება ითქვას, ის ყოველ ეტაპზე ძალიან საინტერესოა.
როდესაც იაპონურ ხელოვნებაზე ვსაუბრობთ, აუცილებელია, ხაზი გავუსვათ, ვინ არის გეიშა. გეიშას შესახებ არაერთი ფილმი არსებობს, რომლითაც ჩვენ შეგვიძლია, მის შესახებ ბევრი შევიტყოთ. ისინი იაპონელები ქალები არიან – იმისთვის, რომ ქალი გეიშა გახდეს, მას ბევრი შრომა და არაერთი ეტაპის გავლა უწევს. საბოლოოდ, ის მრავალმხრივ ცოდნას იღებს – იცის კულტურისა და ხელოვნების არაერთი მიმართულება. როგორც წესი, მათ ქირაობდნენ იმის გამო, რომ შეეძლოთ საზოგადოებაში თავაზიანად მოქცევა და გონივრული საუბარი. ასევე, სტუმრების გასართობად. შედარებით მცირე რაოდენობით, მაგრამ გეიშების სკოლები დღესაც არსებობს.
ჩაის მომზადების რიტუალი იაპონიის ერთერთი მახასიათებელია. ამ ქვეყანაში ჩაის კულტურა სათავეს მე-9 საუკუნიდან იღებს – მას შემდეგ, რაც აქ ის ბუდისტმა ბერებმა ჩინეთიდან შემოიტანეს. უკვე დღეს, იაპონიაში გაშენებული, ჩაის პლანტაციები მთელს მსოფლიოშია სახელგანთქმული.
იაპონური ბაღი – როგორც ვიცით, ტრადიციული იაპონური ბაღები განსხვავებულია საკუთარი დიზაინით, რომელიც ფილოსოფიური იდეების მიხედვითაა შექმნილი და გამორიცხულია, ის სხვებისგან ვერ განასხვავო. მნიშვნელოვანია, რომ აღნიშნული დიზაინი დამახასიათებელია როგორც ადგილობრივების საცხოვრებელი სახლებისთვის, ასევე, საჯარო სივრცეებისთვის – იქნება ეს ტაძარი, დასასვენებელი ტერიტორია თუ სხვა. საინტერესოა, რომ ამ ტიპის ბაღების მცირე ანალოგიები სხვა ქვეყნებშიც გვხვდება.
აუცილებლად უნდა გავუსვათ ხაზი სუშის წარმოშობას – ეს არის იაპონური კერძი, რომელსაც მთელი მსოფლიოს მასშტაბით ადამიანები უდიდესი სიამოვნებით მიირთმევენ. მისი არსებობის ისტორია, დაახლოებით, ოთხ ასწლეულს ითვლის, მიზანი იყო, მოეფიქრებინათ მეთოდი, რითაც თევზის ჯანსაღად და დიდხანს შენახვის საშუალება ექნებოდათ. დღესდღეობით, სუშის უკვე არაერთი ნაირსახეობა არსებობს.
იაპონიის კულტურის ულამაზესი სიმბოლო – საკურა. მისი ფერებია წითელი, ვარდისფერი და თეთრი. საკურას ყვავილობის სეზონი გაზაფხულია. ადგილობრივებისთვის გაზაფხულის მაცნე სწორედ საკურას ყვავილობაა. ეს პერიოდი იაპონელებისთვის განსაკუთრებულია – ისინი ცდილობენ, მაქსიმალურად დატკბნენ ამ პერიოდით და დროს ბაღებში სეირნობით ატარებენ. 27 მარტი არის თარიღი, როდესაც საკურას ყვავილობის დღესასწაული აღინიშნება.
მასალა მოამზადა : მარიამ ტიელიძემ
