საკუთარ თავში რაიმეს შეცვლის სურვილი, ასე თუ ისე, ყველა ადამიანს აქვს. დროებითი ცვლილება იძლევა საშუალებას, ვნახოთ, როგორ გამოვიყურებით განსხვავებულ მოცემულობაში.
მათ შორის, ერთერთი გავრცელებული მოთხოვნილება საკუთარი თვალის ფერის შეცვლაა – დროის გარკვეული მონაკვეთის მანძილზე. თუმცა, ამ შემთხვევაშიც არსებობს რეკომენდაციები, რომლებიც უნდა გავითვალისწინოთ, რათა ამ პროცესმა უსაფრთხოდ ჩაიაროს.
ამის შესახებ “თბილისი თაიმსს” ოფთალმოლოგი, მაკა ლორთქიფანიძე ესაუბრა.
“ამ შემთხვევაში, ადამიანს არ უნდა ჰქონდეს ალერგიული კონიუნქტივი. არ უნდა ჰქონდეს თვალის დაავადებები, როგორიცაა გლაუკომა და კატარაქტა. ასევე. ქრონიკული დაავადებები. არ უნდა მიმდინარეობდეს ქუთუთოს ანთებითი პროცესი და სხვადასხვა სახის კონიუნქტივიტები.
აუცილებელია, თუ ვადა ერთთვიანია, დაცული იყოს ჰიგიენის ნორმები. თუმცა, უფრო მეტად, სასურველია, ერთდღიანი კონტაქტური ლინზების გამოყენება, რასაც განსაკუთრებული ჰიგიენა და დამუშავება არ სჭირდება.
როდესაც ადამიანს ლინზა უკეთია, თვალი უნდა იყოს კარგად დატენიანებული – მან უნდა გამოიყენოს ისეთი ხელოვნური ცრემლი, რომლის დაწვეთებაც კონტაქტურ ლინზაზე შეიძლება.
გასათვალისწინებელია კიდევ ერთი – წამწამების დაგრძელების შემთხვევაში, არ არის სასურველი კონტაქტური ფერადი ლინზის გამოყენება, რადგან წამწამების დამაგრების ადგილია ქუთუთო – ამან შეიძლება, გამოიწვიოს თვალის გაღიზიანება”, -ამბობს მაკა ლორთქიფანიძე.
მასალა მოამზადა : მარიამ ტიელიძემ
