სულ მალე, საქართველოს მოქალაქეებს ექნებათ შესაძლებლობა, TaxiAll-ის მომსახურებით ისარგებლონ. საინტერესოა, რომ მისი სპეციფიკა სხვა ტაქსებისგან განსხვავებული იქნება. მის უმთავრეს მიზანს კი მგზავრების უსაფრთხო გადაადგილება წარმოადგენს.
ამის შესახებ “თბილისი თაიმსს” TaxiAll-ის დამფუძნებელი, ანა ჩანქსელიანი ესაუბრა.
როდიდან იქნება ხელმისაწვდომი TaxiAll-ი?
ის ხელმისაწვომი, დაახლოებით, ერთი თვის შემდგომ იქნება. საწყის ეტაპზე, გამოძახება მოხდება სატელეფონო რეჟიმში, უკვე შემდგომ, შეკვეთების მიღება აპლიკაციით იქნება შესაძლებელი.
საიდან გაჩნდა მისი დაარსების იდეა?
მე ვარ Taxiwoman-ის თანადამფუძნებელი, რომელიც უკვე აღარ ფუნქციონირებს. ის შეიქმნა იმისთვის, რომ გვეზრუნა საზოგადოების უსაფრთხოებაზე. მაშინ ხდებოდა და ახლაც ხდება ბევრი უსიამოვნო ფაქტი ტაქსით გადაადგილებისას. ჩვენი სურვილი იყო, შეგვემცირებინა მსგავსი ფაქტების რაოდენობა. იმის გამო, რომ მსგავსი შემთხვევები უმეტესად ქალბატონებთან მიმართებით ხდებოდა, ჩვენ, უმთავრესად, მათ მომსახურებაზე ვიყავით ორიენტირებული. გამოხმაურებაც იყო მაღალი.
გასაუბრებები ტარდებოდა ფსიქოლოგებთან კონსულტაციის საფუძველზე. ვითხოვდი ძალიან ბევრ დოკუმენტაციას, სანამ მძღოლს ავიყვანდი. მაქსიმალურად ვიყავი ჩართული, რომ უსაფრთხო გარემო შემექმნა მომხმარებლისთვის. ის რომ დაიხურა, გაავწყვიტე, შემექმნა TaxiAll, რომელიც გათვლილი იქნებოდა ყველას მომსახურებაზე.
რით იქნება ის სხვა ტაქსებისგან განსხვავებული?
არ მინდოდა, ყოფილიყო სხვა ტაქსების მსგავსი, რადგან არ იქნებოდა დიდი დაინტერესება. მსურდა, სეგმენტი გამეზარდა მომხმარებლების, რადგან მამაკაცებისგან დიდი უკმაყოფილება წამოვიდა, რომ მათ ჩვენი ტაქსი არ ემსახურებოდა. მისი მახასიათებელი გახლავთ შემდეგი – ქალბატონებს მოემსახურებიან კვლავ ქალბატონები, მამაკაცებს კი – მამაკაცი მძღოლები. საჭიროებამ მოითხოვა, რომ უსაფრთხოება ყოფილიყო უზრუნველყოფილი.
რა სერვისებს შესთავაზებთ დაინტერესებულ ადამიანებს?
გვექნება არაერთი მომსახურება – ბავშვების გადაყვანა სკოლაში, ბაღში, რაც იქნება მშობლების არჩევანი; ასევე, გვექნება დელივერის სერვისი.
რა იქნება პრიორიტეტი TaxiAll-სთვის?
ეს, უპირველესად, იქნება მომხმარებლისა და მძღოლის უსაფრთხოება, მეორე – ჩვენი ქვეყნის პირობებიდან გამომდინარე, მაქსიმალურად ვეცდებით, ჩვენი ტარიფები იყოს ხელმისაწვომი. მინდა, ხაზი გავუსვა, რომ კომპანია არის ქართული, რაც საქართველოსთვის პრიორიტეტია.
მნიშვნელოვანია, რომ წამოიჭრა საკითხი ტრანსგენდერებთან დაკავშირებით. taxiwoman-ის დროს ხშირი იყო ზარები და გვთხოვნენ, რომ მათაც მოვმსახურებოით. ვფიქრობ, ესეც ის ჯგუფია, რომელსაც ჩვენს ქვეყანაში დახმარება სჭირდება. გადავწყვიტე, მათ მივცე არჩევანი, მამაკაცი ტაქსის მძღოლი მოემსახუროთ თუ ქალბატონი.
მასალა მოამზადა : მარიამ ტიელიძემ
