საზოგადოებისთვის ცნობილი გახდა, რომ საქართველოში 17 იანვრიდან თურქეთის ფარმაცევტული მარეგულირებლის მიერ აღიარებული ფარმაცევტული პროდუქციის იმპორტი დაშვებული გახდა. დადგენილების მიხედვით, ფარმაცევტული საშუალებები, რომლებიც თურქეთის ბაზარზეა აკრედიტებული, იქნება ეს თურქული თუ არათურქული წარმოების, საქართველოს ბაზარზეც, შესაბამისად, იქნება აღიარებული.
საკითხს „თბილისი თაიმსთან“ საუბრისას ეკონომიკის ექსპერტი, იოსებ არჩვაძე აფასებს.
„აქ არის ორი ასპექტი – წმინდა ეკონომიკური და სოციალური. რაც უფრო იაფია საქონელი, ეს მით უკეთესია მომხმარებლისთვის. ამ მიმართულებით გადადგმული ნებისმიერი ნაბიჯი მისასალმებელია. მეორე საკითხია, ეს ყველაფერი როგორ უნდა განხორციელდეს, არის ორი გზა – ერთი, როდესაც სახელმწიფო რომელიმე სეგმენტში ახდენს წახალისებას სუბსიდირების ან უპირატესი ხელშეწყობის რეჟიმის ფორმირებით ამა თუ იმ პროდუქციის შემოტანაზე და მეორე – როდესაც ბაზარზე ადგილი აქვს ბევრი მოთამაშის შემოსვლას, რაც გამორიცხავს მონოპოლიურ მდგომარეობას.
ჩვენ გვჭირდება რაც შეიძლება მეტი კვალიფიციური მოთამაშე ამ სფეროში, რათა იყოს კონკურენცია, რაც იქნება მთავარი საფუძველი მედიკამენტების გაიაფების და ეს არ იქნება დამოკიდებული მხოლოდ ხელისუფლების აქტივობაზე ან მის კეთილ ნებაზე“, – განაცხადა იოსებ არჩვაძემ.
მასალა მოამზადა : მარიამ ტიელიძემ
