სხვა მრავალ პრობლემასთან ერთად, მათ შორის, კოვიდი ადამიანებში მხედველობასთან დაკავშირებულ უსიამოვნებებს ტოვებს. რა უნდა ვიცოდეთ ამ საკითხთან დაკავშირებით და როდის უნდა მივმართოთ ექიმს – ამის შესახებ “თბილისი თაიმსს” ოფთალმოლოგი, მაკა ლორთქიფანიძე ესაუბრა.
“კოვიდის დროს ძალიან ხშირია ალერგიული და ბაქტერიული კონიუნქტივიტები. ეს იწვევს გამონადენს, ცრემლდენას და ჰიპერემიას, ანუ თვალის სიწითლეს. ამ ყველაფერს შემდეგ უკვე თან ახლავს მხედველობის მკვეთრი გაუარესება. მკურნალობა ინიშნება, როგორც ჩვეულებრივი კონიუნქტივიტების შემთხვევაში.
კიდევ საყურადღებოა შემდეგი – ძალიან ხშირად ვითარდება აკომოდაციის დარღვევა კოვიდის დროს. შესაძლებელია, რომ მხედველობის გაუარესება მივიღოთ. ძირითადად, ეს უვითარდებათ იმ ადამიანებს, რომლებსაც აქვთ ასიგმატიზმი, მიოპია, ჰიპერმეტროფია”, – განმარტავს მაკა ლორთქიფანიძე.
ის ხაზს უსვამს, რა შემთხვევაშია ექიმის ჩარევა სასწრაფოდ აუცილებელი.
“ასევეა, ხშირი მშრალი თვალის სინდრომის განვითარება. ვისაც კოვიდი რთულ ფორმაში აქვს, ამ შემთვევაში, საცრემლე აპკი კარგად არ ტენიანდება. ეს სიმპტომიც პრეპარატების ჩარევის შედეგად ქრება. თუმცა, ის ძალიან საყურადღებოა დიაბეტიანი პაციენტებისა და გულსისხლძარღვთა პაციენტების შემთხვევაში. სტატისტიკის მიხედვით, ხშირია სისხლჩაქცევები ბადურაზე. ამიტომ, როდესაც ზემოაღნიშნული პაციენტები მხედველობის მკვეთრს გაუარესებას შეამჩნევენ, კოვიდპანდემიის დასრულებისთანავე, მათ უნდა მიმართონ ექიმს და ჩატარდეს შესაბამისი მკურნალობა.
გარდა ამისა, რთული კოვიდპაციენტების შემთხვევაში, რომლებსაც სტეროიდებს უნიშნავენ, იწვევს თვალშიდა წნევის მომატებას და ამ შემთვევაშიც აუცილებელია კონტროლი, რათა თვალის წნევის საწინააღმდეგო პრეპარატები იქნეს დანიშნული”, – ამბობს მაკა ლორთქიფანიძე “თბილისი თაიმსთან” საუბრისას.
მასალა მოამზადა : მარიამ ტიელიძემ
