„ნებისმიერი ვალუტის კურსზე გავლენას სხვადასხვა ფაქტორი ახდენს. მათ შორის, შიდა, გარე, ობიექტური და სუბიექტური ფაქტორები. რა თქმა უნდა, ძალიან მნიშვნელოვანია საზოგადოების წევრთა განწყობა – ის მოლოდინები, რაც საზოგადოებაში არსებობს ეკონომიკის და, კერძოდ, ეროვნული ვალუტის მომავალთან დაკავშირებით. თუ იმედები, მოლოდინები ოპტიმისტურია, მაშინ ეს იმოქმედებს ეროვნული ვალუტის გამყარებაზე. მაგრამ თუ პროგნოზები ნეგატიურია, ეს უარყოფითად იმოქმედებს“, – ამის შესახებ ეკონომიკის ექსპერტმა, იოსებ არჩვაძემ „თბილისი თაიმსს“ ლარის კურსზე საუბრისას განუცხადა.
როგორც ექსპერტმა აღნიშნა, ბოლო დღეებში საზოგადოებაში დიდი აჟიოტაჟია.
„ბოლო დღეების მანძილზე, ამ მხრივ, დიდი აჟიოტაჟის მომსწრეები ვართ. ქართული ანდაზაა – “ისე არ წვიმს, როგორც ქუხს”. ამ აჟიოტაჟმა, ცალკე სამომხმარებლო ბაზარზე, იქნება ეს შაქარი თუ სხვა პროდუქტი, თუ სავალუტო ჯიხურები, ყველაფერმა ხელი შეუწყო ლარის კურსის დაცემას. სამომხმარებლო ბაზარზე კი გარკვეული პროდუქტების ფასები გაიზარდა – ამის ეკონომიკური საფუძველი არ არსებობს.
ამ შემთხვევაში, მოგებული დარჩა ის, ვინც გაყიდა – რადგან გაყიდა ძვირად. წაგებული კი დარჩა ის, ვინც, თავისი აზრით, საკუთარი დანაზოგი გადაარჩინა და პროდუქტების სტრატეგიული რეზერვი შექმნა. ლარი რომ კალაპოტში ჩადგება, აღმოჩნდება, რომ ამდენი შაქარი საჭირო არ იყო. ყოველთვის ჯობს, ნაკლებად ავყვეთ, ვიაზროვნოთ და ვიმოქმედოთ რაციონალურად“, – განაცხადა იოსებ არჩვაძემ.
