“პურის მწარმოებელთა ასოციაციამ თქვა, რომ მაისამდე პურის ფასი არ შეიცვლება, რადგან, ჯერჯერობით, არის მარაგები. მსოფლიო ბაზარზე ფასები აწეულია. ასე ვთქვათ, უკრაინა და რუსეთი თამაშს გამოეთიშნენ. ისინი მსოფლიო ბაზარს ხორბალს ვერ აწვდიან. მთლიანად, ეს გახლავთ 30%, რუსეთი – 20%, უკრაინა – 10%. შესაბამისად, ხორბლის ფასი ჩვენც გაგვიძვირდა”, – ამის შესახებ საქართველოს ხორბლისა და ფქვილის მწარმოებელთა ასოციაციის აღმასრულებელმა დირექტორმა, ლევან სილაგავამ “თბილისი თაიმსთან” საუბრისას განაცხადა.
როგორც სილაგავამ აღნიშნა, საქართველოში ხორბლის რუსეთიდან შემოტანა ლოჯისტიკურად უფრო იაფი ჯდებოდა.
“ხორბალი რუსეთიდან შემოდიოდა, რადგან ლოჯისტიკურად უფრო იაფი იყო – არის სამი შემოსასვლელი: ზღვით, რკინიგზით და ლარსის საბაჟო. ახლა ჩვენ ყაზახეთზე გადავერთეთ, მაგრამ ფასები, მათ შორის, ყაზახეთშიც მომატებულია. ასევე, გვაქვს რუმინეთის შემოთავაზება. თუმცა, ეს ფასი იქნება უფრო მაღალი. ბოლო ერთ კვირაში, დაახლოებით, 40 დოლარით გაიზარდა ერთი ტონა ხორბლის ფასი. შემოტანა, დაახლოებით, 340 დოლარი ჯდება, შემდეგი შემოტანები რომ შემოვა, მაისის შემდეგ, ხორბლის ფასიდან გამომდინარე შესაძლოა, პურის ფასის მატების საკითხი დადგეს. თუმცა, ამ შემთხვევაში, უკვე სახელმწიფო ამბობს, რომ თუ პურის ფასის გაზრდის წინაპირობა იქნება, ისინი ჩაერევიან სუბსიდირების პროგრამით.
შესაბამისად, ის კომპანიები, რომლებიც სუბსიდირების პროგრამაში ტენდერით შევლენ, ვალდებულებას იღებენ, შემოიტანონ ხორბალი ისეთ ფასად, რომ პურის მწარმოებლებს მიაწოდონ იმ ღირებულებით, რაც დღეს არის და პური არ გაძვირდეს. ეს არის სქემა, რომელიც ადრეც, პანდემიის დროსაც მუშაობდა. თუ ამუშავდება სუბსიდირების პროგრამა და, სავარაუდოდ, მთავრობის მომავალ სხდომაზე უნდა გავიდეს, მაშინ ჩვენ ვნახავთ პარამეტრებს, როგორი ტენდერი იქნება, რა მონაცემები და ა.შ. ამის შემდგომი ორიენტირი გვაქვს პირველი ივნისი. ეს იქნება ორთვიანი პროგრამა. ეს თარიღი იმიტომ, რომ მოდის ხორბლის ახალი მოსავალი, მათ შორის, საქართველოშიც”, – განმარტა ლევან სილაგავამ.
