უკვე ერთ თვეზე მეტი გავიდა მას შემდეგ, რაც რუსეთი უკრაინაში შეიჭრა. ამ დღიდან მოყოლებული, მიმდინარე ომს ძალიან ბევრი მშვიდობიანი მოსახლე ემსხვერპლა უკრაინის მხრიდან. თუმცა, არაერთი ვიდეო-თუ ფოტომასალა ვრცელდება იმის დასტურად, როგორ უწევს უკრაინული არმია მტერს წინააღმდეგობას.
პოლიტოლოგი, მამუკა არეშიძე “თბილისი თაიმსს” ესაუბრა, თუ რა უპირატესობები აქვს უკრაინას ოკუპანტებთან მიმართებით.
“უკრაინულ მხარეს აქვს შემდეგი უპირატესობები – დასავლეთის უზარმაზარი მხარდაჭერა, მსოფლიოს დიდი ნაწილის გვერდში დგომა – ტექნიკური, სამხედრო, პოლიტიკური. მნიშვნელოვანია მსოფლიო საზოგადოებების ძალიან დიდი მხარდაჭერა. ხაზგასასმელია საბრძოლო გამოცდილება და, რვა წლის განმავლობაში, წვრთნის შესაბამისი პროცესის გავლა.
უნდა აღვნიშნოთ საკუთარი ბრძოლის ტაქტიკური გეგმის თავსმოხვევა მეტოქესთან. რაც ყველაზე მთავარია, უკრაინული მხარის უპირატესობას წარმოადგენს მორალური მდგომარეობა და საბრძოლო სული. ეს ძალიან მნიშვნელოვანი ფაქტორია”, – განმარტავს მამუკა არეშიძე.
