“ფაქტია, რომ უკრაინაში მიმდინარე საომარმა მოქმედებებმა გავლენა მოახდინა კავკასიის რეგიონზეც. ვფიქრობ, აზერბაიჯანის ნაბიჯი, ასე თავისუფლად შესულიყო რუსეთის სამშვიდობო ძალების მიერ კონტროლირებად ტერიტორიაზე, განპირობებულია იმით, რომ გარკვეული სამხედრო კონტინგენტი მთიანი ყარაბაღიდანაც გადაისროლა რუსეთმა უკრაინაში სამხედრო მოქმედებების საწარმოებლად – რადგან საკმარისი არ აღმოაჩნდა უკრანაში შეჭრისთვის მობილიზებული რესურსი. უნდა ითქვას ისიც, რომ ასეთი ნაბიჯი შესაძლოა, შეთანხმებული იყოს თურქეთთანაც და რუსეთის გარკვეულ წრეებთან. ეს არის ვარაუდი და ვფიქრობ, მას აქვს არსებობის უფლება”, – ამის შესახებ პროფესორმა, ზაზა ცოტნიაშვილმა “თბილისი თაიმსთან” საუბრისას განაცხადა.
ცოტნიაშვილმა რამდენიმე დღის წინ მომხდარი ფაქტი შეაფასა, რომლის მიხედვითაც რუსეთის სამშვიდობო ძალების მიერ კონტროლირებად ტერიტორიაზე, ყარაბაღში აზერბაიჯანმა ერთი სოფელი დაიკავა.
“ბუნებრივია, რომ საკმაოდ სერიოზული პრობლემები აქვს რუსეთის ჯარს უკრაინასთან ომში. ჩვენ ვნახეთ, რომ, პრაქტიკულად, ის რესურსი, რომელიც მობილიზებული იყო ევროპის უზარმაზარი ქვეყნის ტერიტორიაზე ომის წარმოებისთვის, საკმარისი არ აღმოჩნდა და რუსეთი გახდა იძულებული, ჯარების მობილიზება მოეხდინა ისეთი პრობლემური რეგიონებიდან, როგორიც არის აფხაზეთი, ცხინვალის რეგიონი და მთიანი ყარაბაღი. მაგრამ ეს იმას არ ნიშნავს, რომ, ამ ეტაპზე, რუსეთს არ შეუძლია, საკუთარი სიტყვა თქვას ამ რეგიონებშიც კი. ჩვენ ვხედავთ, რომ, ამ პროცესებიც შემდგომ, რუსეთმა ოფიციალურად მოსთხოვა აზერბაიჯანს, შეაჩეროს სამხედრო ნაწილების წინ წაწევა სამშვიდობო ძალების კონტროლირებად ტერიტორიაზე და დაბრუნდეს საწყის მდგომარეობაზე. თუმცა, აზერბაიჯანის მხრიდან, ამ ეტაპზე, მყისიერი რეაგირება არ ჩანს.
მთიანი ყარაბაღის ტერიტორიაზე ასეთი შესვლა, მოგეხსენებათ, რომ აზერბაიჯანის ისტორიული მისიის ნაწილი გახლავთ. თითოეული გოჯი მიწა მათ ძალიან ძვირი უღირთ. ამ ეტაპზე, გაკონტროლებულია ერთი სოფელი და მათ მიზნად აქვთ სხვა სიმაღლეების დაუფლებაც. თუმცა, რუსეთის განცხადების შემდეგ წინსვლა არ შეინიშნება. პროცესები შეჩერებულია, რაც იმას ნიშნავს, რომ შემდგომი გართულებების მომხრე მოსკოვი არ არის. შესაბამისად, ბაქოც არ ირჩევს დიდ ინიციატივას, რომ გააგრძელოს აქტიური წინსვლა მთიანი ყარაბაღის სიღრმეებში”, – განმარტა ზაზა ცოტნიაშვილმა.
