“მე ვფიქრობ, რომ რუსეთმა ჯარები კი არ გაიყვანა, არამედ – გადააჯგუფა. თვალსაწიერ მომავალში, ჩემი გათვლებით, რუსეთი არ შეწყვეტს სამხედრო მოქმედებებს უკრაინაში. შესაბამისად, ეს გადაჯგუფება ემსახურება იმას, რომ უკვე ახალი ძალებით შეუტიონ იმ მიმართულებებს, რომლებიც მათ ეჩვენებათ სტრატეგიულად”, – ამის შესახებ ანალიტიკოსმა, ზაალ ანჯაფარიძემ “თბილისი თაიმსთან” საუბრისას განაცხადა.
ანჯაფარიძემ უკრაინაში არსებული ვითარება შეაფასა და განმარტა, რომ რუსეთისთვის, ამ ეტაპზე, მთავარი მიზანი არის მარიუპოლის დაცემა.
“ჯერჯერობით, რუსეთისთვის მთავარი მიზანი, უახლოეს დღეებში, არის მარიუპოლი. თუ მარიუპოლი დაეცა, ეს უკვე იქნება იმის ნიშანი, რომ რუსეთი ამას საკუთარ მოსახლეობას შეასაღებს, როგორც მნიშვნელოვან სამხედრო წარმატებას, რაც მას წაახალისებს, რომ სხვა მიმართულებებითაც გააგრძელოს სამხედრო მოქმედებები. ეს შეიძლება, იყოს კიევი, ხარკოვი, ჩერნიგოვი… სწორედ ამას ემსახურება გადაჯგუფება. რუსეთის სამხედრო-პოლიტიკური ხელმძღვანელობა, საერთაშორისო დონეზე, თვალის ასახვევად ამბობს, რომ, თითქოს, მათ სამხედრო მოქმედებების ინტენსივობა შეამცირეს. სინამდვილეში, ეს არის მზადება ახალი დარტყმისთვის”, – აღნიშნა ზაალ ანჯაფარიძემ.
