არაერთი შემთხვევის შესახებ გვსმენია, როდესაც ადამიანი კონკრეტული მიმართულებით იძენს ცოდნას, ეს პროფესია აინტერესებს და დასაქმებულიც კი არის, თუმცა, გამოჩნდება რაღაც სხვა – რისი კეთებაც მისთვის უდიდესი სიამოვნებაა. ზურა დააშაშვილი დამწყები ფოტოგრაფია. ამ მხრივ მისი ისტორია არცთუ ისე დიდი ხნის წინ დაიწყო. თუმცა, დიდი მონდომების გამო, მან უკვე არაერთი ნაბიჯი გადადგა.
პროფესიით თარჯიმანი ვარ. უკვე 8 წელია, ვთარგმნი სხვადასხვა მასალასა თუ დოკუმენტს. ასევე, თანმიმდევრული თარგმნით ვარ დაკავებული, ძალიან მიყვარს ჩემი პროფესია. მიუხედავად სათარჯიმნო წარმატებისა, ყოველთვის მინდოდა, რომ კარგი ფოტოგრაფი ვყოფილიყავი. ამაში კი ჩემმა ძვირფასმა მეუღლემ ძალიან დიდი წვლილი შეიტანა, სწორედ მის მიერ გამხნევების შედეგად გადავწყვიტე ფოტოგრაფიის კურსის გავლა და ასეც მოვიქეცი. საქართველოში ერთ-ერთ ყველაზე მაგარ ფოტოგრაფთან ჩავეწერე კურსზე, ნათია ღაჭავასთან.
კურსის განმავლობაში, რა გადაწყვეტილება მიიღეთ ფოტოგრაფიასთან დაკავშირებით?
კურსის დასრულებული არ მქონდა, რომ დავრწმუნდი, აუცილებლად უნდა გავმხდარიყავი ფოტოგრაფი; ამიტომ, გადავწყვიტე, საკმაოდ დიდი თანხა მესესხა და კარგი აპარატურა შემეძინა. მართლაც რომ საუკეთესო აპარატურა შევიძინე ფოტოგრაფიის იმ სფეროსთვის, რომლითაც დავკავდებოდი. პირველი ფოტოსესია გადავიღე და კურსიც წარმატებით დავამთავრე.
ახლა ვცდილობ, რომ ვითანამშრომლო სხვადასხვა ბრენდთან (ტანსაცმლის, აქსესუარების, კარვების და სხვ.), მოდელებთან, რათა მშვენიერი პორთფოლიო შევქმნა. ორმხრივი თანამშრომლობით, ორივე, მე, როგორც ფოტოგრაფი და სხვა ბრენდები, ვფიქრობ – დიდ უპირატესობას შევიძენთ.
რა სირთულეებთან არის დაკავშირებული თქვენი საქმიანობა?
ეს ყველაფერი არ არის მარტივი, რადგან ბევრ შრომას, დროსა და ენერგიას მოითხოვს, უნივერსიტეტს მალე დავამთავრებ წითელ დიპლომზე, რაც ძალიან გვახარებს მე და ჩემს მეუღლეს, თუმცა, ამ ყველაფრის კეთება მთელს ენერგიას გვაცლის, 1 წლის შვილი გვყავს და ჩვენი ენერგიის 80% მის აღზრდასა და განვითარებაზე იხარჯება, ყველაფერი ეს ძალიან მახარებს და ძალას მმატებს.
ფოტოხელოვნების მიმართულებით, რა არის თქვენი მიზანი?
ფოტოგრაფია ხელოვნებაა, ისევე, როგორც მხატვრობა, მუსიკა, პოეზია თუ სხვა, თუმცა, მათ მსგავსად ფოტოგრაფიასაც აქვს სფეროები და მიმართულებები, რომლითაც იხიბლება ფოტოგრაფიის მოყვარულთა კონკრეტული კატეგორია. მაგალითად, მოდა, ფოტოჟურნალისტიკა, არქიტექტურის ფოტოგრაფია და სხვ. თუმცა, მე მსურს, რომ ჩემი ნამუშევრები რომელიმე კონკრეტული საზოგადოებისთვის კი არ იყოს მიმზიდველი და სასურველი, არამედ – ნებისმიერი პროფესიის თუ მისწრაფების მქონე ადამიანისა და საზოგადოებისთვის, ამიტომ ვცდილობ, რომ სხვადასხვა პროფესიის თუ გემოვნების მქონე ადამიანებთან ვიქონიო შეხება.