“მიღებულია გადაწყვეტილება, რომ 50 წლის ზემოთ ადამიანებს მიეცეთ მტკიცე რეკომენდაცია – გაიკეთონ ვაქცინის მე-4 დოზა, ანუ მეორე “ბუსტერი”, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.
როგორც გამყრელიძემ აღნიშნა, დაახლოებით, 4 000-მდე ადამიანს 4 დოზა ქვეყანაში გაკეთებული აქვს სხვადასხვა მიზნით, მათ შორის, ქრონიკული დაავადებებით დაავადებულებს, მაგრამ უკვე გადაწყვეტილებაა, რომ 50 წლის ზემოთ ადამიანებს მიეცეთ მტკიცე რეკომენდაცია, მათ გაიკეთონ მეორე “ბუსტერი” 4 თვის შემდეგ პირველი “ბუსტერიდან” ან დაავადების გადატანიდან. მანვე აღნიშნა, რომ ქვემო ასაკად განისაზღვრება 12 წელი – 12 წლის ასაკის ზემოთ მეოთხე დოზა რეკომენდებული იქნება იმ ადამიანებისთვის, ვისაც აქვთ ქრონიკული დაავადებები.
საკითხს “თბილისი თაიმსთან” საუბრისას პროფესორი, მაკა ბულეიშვილი გამოეხმაურა.
“მეორე “ბუსტერი” დაშვებული იქნება 50 წელს გადაცილებული ადამიანებისთვის. უკვე სულ მალე იქნება დასაშვები. რადგან მიიღეს აღნიშნული გადაწყვეტილება იმუნიზაციის საბჭოზე. აღნიშნული ასაკის წარმომადგენლებისთვის, უფრო მეტად, იმიტომ არის მეოთხე დოზის რეკომენდაცია, რომ შედარებით მეტია რისკფაქტორი – მაგალითად, ქრონიკული დაავადებების მქონე ადამიანები. მათთვის დაცულობის მეტი მექანიზმი უნდა არსებობდეს”, – განაცხადა ბულეიშვილმა.
