“კონტრშეტევები ომის წესია – თუ გინდა, შეინარჩუნო ტერიტორია, რასაკვირველია, აქტიური საომარი მოქმედებები უნდა აწარმოო. რაც შეეხება, ამ მხრივ, უკრაინელების რესურსს – რესურსი მათ ნამდვილად აქვთ იმიტომ, რომ ახალი სარეზერვო, ძალიან სერიოზული დანაყოფებია მომზადებული და, პლუს, ისინი შეიარაღებულნი არიან უახლესი იარაღით. მიუხედავად იმისა, რომ იარაღის შემოტანა ძალიან გართულდა, რადგან რუსები საკომუნიკაციო ხაზებს აქტიურად ბომბავენ, ასევე – ხიდებს, რომელთა მოშევეობითაც ტექნიკა გადაადგილდება, სარეზერვო ჯგუფები, დაახლოებით, 60 000 კაცის ოდენობით, მომზადებულია და ბრძოლაში ჩაერთვება”, – ამის შესახებ პოლიტოლოგმა, მამუკა არეშიძემ “თბილისი თაიმსთან” საუბრისას განაცხადა.
როგორც პოლიტოლოგმა აღნიშნა, რესურსი რუსეთსაც აქვს.
“რომ გითხრათ, რუსებს არ აქვთ რესურსი – ეს ასე არ არის. ჯერჯერობით, ჰყავთ, მიუხედავად იმისა, რომ, სამხედრო ექსპერტთა შეფასებით, 250 ბატალიონის ნაცვლად თავმოყრილი ჰყავთ 240-მდე. მას კი 250 ბატალიონი სჭირდება იმ ამოცანის შესასრულებლად, რომელიც ჩანს, რომ რუსეთს დასახული აქვს.
გარდა ამისა, რუსები ჩუმ მობილიზაციას აწარმოებენ. საკონტრაქტო ხელშეკრულებით ქირაობენ პირებს და, გარდა ამისა, ომში რთავენ კურსანტებს, სხვადასხვა სამხედრო სასწავლებლიდან. ვერ ვიტყვი, რომ რომელიმე მხარეს ომში აქვს გადამწყვეტი უპირატესობა. ერთადერთი, ის არის, რომ რუსეთს აქვს გადამწყვეტი უპირატესობა საჰაერო თვალსაზრისით”, – განმარტა არეშიძემ და ხაზი გაუსვა, თუ რა წარმოადგენს უკრაინელებისთვის მთავარ ამოცანას,
“ამოცანებს რაც შეეხება – უკრაინელების ამოცანას იმ ტერიტორიების გათავისუფლება წარმოადგენს, რომლებიც დაკავებულია რუსეთის მიერ, ეს არის ხერსონი, ხარკოვის მიმართულება, ლუგანსკი, დონეცკი და ა.შ.”.
