“მარიუპოლი უკრაინაში ომის ყველაზე ცხელი და, შეიძლება ითქვას, კაცობრიობის ისტორიაში ერთერთი ტრაგიკული ადგილია, სადაც ადამიანები, საკუთარი მრწამსით, იცავენ სამშობლოს დამოუკიდებლობას და არიან უმძიმეს ბლოკადაში. პრაქტიკულად, აქ იღუპებიან შიმშილით, მედიკამენტების არქონით, ანტისანიტარიით, არიან დაბომბვის, უდიდესი სამხედრო ზეწოლის ქვეშ. ამავე დროს, თავს იცავენ გმირულად და ხშირად უტევენ კიდეც ოკუპანტებს. ამ დროს მსოფლიოს, პრაქტიკულად, არაფრის გაკეთება შეუძლია, არის რამდენიმე ვერსია მათ გამოყვანასთან დაკავშირებით, ვინც მძიმედ არიან დაჭრილები, ასევე, სამხედროების გადარჩენასთან დაკავშირებით. როგორც აცხადებენ, თითქმის ყველა გადარჩენილი მშვიდობიანი მოქალაქე გამოიყვანეს. საქმე იქამდეც კი მივიდა, რომ მათ დახმარება ილონ მასკს სთხოვეს”, – ამის შესახებ კონფლიქტოლოგმა, ზაზა ცოტნიაშვილმა “თბილისი თაიმსთან” საუბრისას განაცხადა.
კონფლიქტოლოგმა მარიუპოლში არსებული რეალობა შეაფასა და განმარტა, რამდენად არის შესაძლებელი მარიუპოლის დე-ბლოკადა.
“როგორც უკრაინის პრემიერ-მინისტრი აცხადებს, თურქეთი ასევე აქტიურადაა ჩართული, რომ აზოველები მესამე, საკუთარ ქვეყანაში გაიყვანოს და ომის დასრულებამდე ისინი იქ დატოვოს, არ მიაღებინოს მონაწილეობა სამხედრო მოქმედებებში რუსული ოკუპაციის წინააღმდეგ, თუ, რა თქმა უნდა, რუსეთი მოახდენს დე-ბლოკადას და მისცემს ნებას, დაჭრილებმა და მებრძოლებმა დატოვონ ტერიტორია.
პრეზიდენტმა ზელენსკიმ რამდენიმე დღის წინ განაცხადა, რომ შეუძლებელია იქ რაიმე ისეთი სამხედრო ოპერაციის ჩატარება, რომლითაც მოხერხდება უკრაინული ძალებით სამშვიდობო დერეფნის გახსნა.
მებრძოლებში არსებობს გარკვეული მოლოდინი დასავლეთისგან ისეთი იარაღის მიღებასთან დაკავშირებით, რომელიც უკრაინულ მხარეს მისცემს მარიუპოლის დე-ბლოკადის შესაძლებლობას. სამწუხაროდ, დღევანდელი ვითარება ვერ გვკარნახობს ასეთ გამოსავალს.
სიტუაცია არის უმძიმესი და როგორ განვითარდება მოვლენები, ძალიან რთული წარმოსადგენია, რადგან, აღნიშნულზე რუსეთის ფედერაცია დუმს. მის ხელშია მარიუპოლელთა სიცოცხლე. აზოველების მიმართ მათ აქვთ ძალიან დაუნდობელი პოზიცია. შეიძლება ითქვას, ამ ეტაპზე. “აზოვსტალის” დამცველები განწირულები არიან. იმედია, მოიძებნება გამოსავალი. ერთი სიცოცხლის გადარჩენაც ძალიან მნიშვნელოვანი იქნება”, – განაცხადა ზაზა ცოტნიაშვილმა.
