საზოგადოების გარკვეული ნაწილისთვის გაუგებარია, როგორ იქმნება ნამუშევრები, რომლებიც აშკარად სრულყოფილია. ჩვენ დარწმუნებულები ვართ, რომ მათი შესრულება, თითოეული დეტალი ბევრ სირთულესა და დიდ შრომასთან არის დაკავშირებული. ეს ნამდვილად ასეა. თუმცა, ხელოვანისთვის ეს პროცესი დიდ სიამოვნებასთან, ხალისსა და განტვირთვასთან ასოცირდება.
ნინო აფხაზოვი ნამუშევრებს ლენტებითა და ძაფებით ქმნის. როგორც ის აღნიშნავს, ამ დროს მისთვის მთავარი მონდომება და განწყობაა.
“ამ მხრივ, თვითნასწავლი არ ვარ. ვსწავლობდი სამების ლავრის სკოლაში ბისერებით ქარგვის კურსებზე, ასევე, გავიარე სუტაჟის ტექნიკით სამკაულების დამზადების და ლენტებით ქარგვის კურსები სასწავლო ცენტრ “თიენსი”-ში. კანვაზე ქარგვა ჩემით შევისწავლე ინტერნეტით. ასევე, ვსწავლობდი სამხატვრო სტუდიაში.
ქარგვა რთული არ არის, მთავარია მონდომება და განწყობა. გარდა ამისა, მნიშვნელოვანია ფერების შერჩევა. ნამუშევრებს შეკვეთითაც ვამზადებ. ზოგს საკუთარი შვილის ფოტოს მოქარგვა უნდა, ზოგს კი სხვა ფერებში სურს. უმეტესად, მომხმარებლები მათ ბავშვის ოთახის გასალამაზებლად ყიდულობენ.
ეს იყო ჩემი პირველი ნამუშევარი პრინტი. დიდი მოწონება დაიმსახურა. მას შემდეგ გადავწყვიტე ასეთი სტილის პრინტებზე მუშაობა, ასევე. ძალიან მიყვარს საქორწილო პრინტების ქარგვა“, – ამბობს ნინო აფხაზოვი „თბილისი თაიმსთან“ საუბრისას.
