18-19 ივნისს ხურვალეთის მიმდებარე ტერიტორიაზე საოკუპაციო ძალებმა ე.წ ბორდერიზაციის პროცესი აქტიურად განაახლეს.
მომხდარის შესახებ ინფორმაციას სახელმწიფო უსაფრთხოების სამსახური ადასტურებს.
პროცესებთან დაკავშირებით სუს-მა ცხელი ხაზი აამოქმედა. გარდა ამისა, მოხდა ევროკავშირის სადამკვირვებლო მისიისა და ჟენევის დისკუსიების თანათავმჯდომარეების ინფორმირება.
“საკითხი მწვავედ დაისმება ერგნეთის ინციდენტების პრევენციისა და მათზე რეაგირების მექანიზმის შეხვედრის ფარგლებში, ასევე ჟენევის საერთაშორისო დისკუსიებზე. უკანონო ე.წ. ბორდერიზაცია და მის ფარგლებში აღმართული უკანონო ინსტალაციები ხელს უშლის თავისუფალ გადაადგილებას, ართულებს ადგილობრივი მოსახლეობის ყოველდღიურ ცხოვრებას და აზიანებს ადგილზე არსებულ უსაფრთხოების გარემოს. მიმდინარე პროცესზე სრული პასუხისმგებლობა ეკისრება საოკუპაციო ძალას”,- აღნიშნულია სუს-ის ინფორმაციაში.
მასალა მოამზადა: თორნიკე ყრუაშვილმა