ივანე ლელაშვილი ერთერთია მათ შორის, ვინც საქართველოში სოფლის მეურნეობის განვითარებას უწყობს ხელს და დგამს ნაბიჯებს იმისთვის, რომ, საკუთარი ცოდნით, ხელი შეუწყოს ქვეყნის წინსვლას კონკრეტულ სფეროში. არცთუ ისე დიდი ხნის წინ, მან მიიღო გადაწყვეტილება, მიღებული გამოცდილება საქართველოში გამოეყენებინა და ფსტის ნერგების გასენება დაიწყო. ეს იდეა წარმატებულ რეალობად იქცა და დღეს უკვე, შეიძლება ითქვას, უწყვეტად შენდება ფსტის ბაღები. “თბილისი თაიმსს” ივანე თავად უყვება.
“2019 წლიდან მე დავკავდი საქართველოში ფსტის მოყვანით. იქამდე, ვიყავი თურქეთში, სადაც 6 წლის მანძილზე ვმუშაობდი ამ მიმართულებით. როდესაც იმ პერიოდში გავიგე, რომ საქართველოში ფსტის წარმოებას იწყებდნენ, მეც დავინტერესდი. დავიწყეთ ნერგების გაშენება – გავაშენეთ კახეთში, ორი წელია. დღეს გვყავს კლიენტებიც. სოფლის მეურნეობაში ვართ ჩართულები – “დანერგე მომავალში”. ამ ეტაპზე, ჩემი ბაღი 6 ჰექტარს მოიცავს. თითქმის ყოველდღიურად ვაშენებთ ბაღებს, ვეხმარებით, ვუწევთ კონსულტაციებს და თუ საქართველოში, სადმე ფსტის ბაღებია გაშენებული, ყველგან ჩვენ დავდივართ კონსულტაციებზე. ვეხმარებით ყველას, რისი საშუალებაც ჩვენი გამოცდილებიდან გამომდინარე გვაქვს. ჩვენს პროფესიას ვიყენებთ აქ, საქართველოში და ველოდებით მეტ წინსვლას”, – ამბობს ივანე და განმარტავს, რომ აქტიურად თანამშრომლობს USAID-ის სოფლის მეურნეობის პროგრამასთან და ამ პროგრამის ბენეფიციარია.
“აქტიურად ვთანამშრომლობ USAID-ის სოფლის მეურნეობის პროგრამასთან. ვარ ამ პროგრამის ბენეფიციარი. კერძოდ, ჩართული ვარ სარგავი მასალის სერტიფიცირების პროგრამაში, რომლის ფარგლებშიც გავიარე სერტიფიცირების პროცესი და ვაწარმოებ სერტიფიცირებულ ფსტის ნერგებს. მაქვს შესაბამისი ხარისხის სერტიფიკატიც, რაც დასტურდება ასევე ეტიკეტებიდანაც.
ასევე, ამ პროგრამის დახმარებით, გახლდით ანტალიაში სასოფლო სამეურნეო გამოფენაზე, სადაც დავამყარე საქმიანი კონტაქტები სირთის ფსტის მწარმოებელი ასოციაციის პრეზიდენტთან და შემოვიტანე ქირმიზის ჯიშის სათესლე მასალა. გარდა ამისა, აქტიურად ვმუშაობთ კვირტით მყნობაზე. მყნობის განსახორციელებლად ერთობლივად ჩამოვიყვანეთ თურქეთიდან აგრონომი, რომელმაც ლაგოდეხის რაიონში ჩაატარა სადემონსტრაციო მყნობა, რომელსაც ესწრებოდნენ ადგილობრივი აგრონომები და ფერმერები”, – ამბობს ივანე ლელაშვილი.