კულინარიული პროექტის – “მასტერშეფის” კიდევ ერთი, მორიგი სეზონი წარმატებით დასრულდა – როგორც ჟიურის წევრები და მაყურებლები მიიჩნევენ, ეს იყო ყველაზე მეტად კონკურენტული სეზონი, სადაც ფინალში ერთმანეთს ძალიან ძლიერი მონაწილეები დაუპირისპირდნენ.
პროექტის მეშვიდე სეზონის ერთერთი ფინალისტი და გამორჩეული კონკურსანტი მარიამ ბართიაა. ის პროფესიით კულინარია – დამთავრებული აქვს აგრარული უნივერსიტეტის კულინარიული. მან საკუთარ გულშემატკივარსა და მაყურებელს თავი დაამახსოვრა, როგორც სტაბილურმა და ძლიერმა მონაწილემ. “თბილისი თაიმსს” მარიამი უყვება, თუ როგორ მოხვდა “მასტერშეფის” ქასთინგზე.
“ჩემს შემთხვევაში ასე მოხდა – მეგობარს შევუვსეთ ანკეტა ხუმრობით. გავყევი გასაუბრებაზე. იქ მყოფი ერთერთი ნაცნობის დაჟინებული თხოვნა იყო, რომ მიმეღო მონაწილეობა. ასე აღმოვჩნდი “მასტერშეფში”.
პროექტის დასრულების შემდგომ, ჯერჯერობით, ნათელი და კონკრეტული გეგმები არ მაქვს, თუმცა, არის ისეთები, რასაც უახლოეს მომავალში ვაპირებ”, – ამბობს მარიამი და აღნიშნავს, რომ მისი ყოველდღიურობა სრულად არის დაკავშირებული კულინარიასთან.
“თავიდან ბოლომდე ამ სფეროში ვარ. სკოლის დამთავრებიდან, ამ მიმართულებით ვმუშაობ. გამორჩეული ჰობი არ მაქვს. სტანდარტულად, მუსიკა, კითხვა მეც მიყვარს.
ჩემი გადმოსახედიდან, სეზონი იყო ძალიან კარგი. მადლობელი ვარ იმ თითოეული ადამიანის, გულშემატკივრებს, ვინც თბილ და სიყვარულით სავსე შეტყობინებებს მწერს”.
