„იყო რამდენიმე მიზეზი – მათ შორის, გეოპოლიტიკური, როგორც მაკრონმა თქვა. ასევე, ის პროცესები, რომლებიც საქართველოში მიმდინარეობს, იქნება ეს რეგულაციების თემა თუ სხვ. მაგრამ მე მგონია, რომ ის მაინც არ არის მთავარი, რაც დევს ზედაპირზე. მთავარია გეოპოლიტიკური საკითხი, რომელიც დაკავშირებულია რუსეთთან. სხვათა შორის, ისიც, რომ საბოლოო გადაწყვეტილება ექვს თვეშია მისაღები, გარკვეულწილად, იმაზეა დამოკიდებული, როგორ დამთავრდება ომი უკრაინაში“, – ამის შესახებ პოლიტოლოგმა, მამუკა არეშიძემ „თბილისი თაიმსთან“ საუბრისას განაცხადა და ევროპული საბჭოს მიერ მიღებულ გადაწყვეტილებას გამოეხმაურა, რომლის მიხედვითაც უკრიანამ და მოლდოვამ კანდიდატის სტატუსი მიიღეს, ასევე, საბჭომ აღიარა საქართველოს ევროპული პერსპექტივა და გამოხატა მზადყოფნა, ქვეყანას მიანიჭოს კანდიდატის სტატუსი.
„დასავლელი პოლიტიკოსებისთვის – განსაკუთრებით, მათთვის, ვინც სამხედრო-პოლიტიკურ გადაწყვეტილებებს იღებს, საეჭვოა, რომ რუსეთის გამარჯვების შემთხვევაში რუსეთმა არ მოინდომოს პოსტსაბჭოთა სივრცის დანარჩენი ტერიტორიების “მოსუფთავებაც”. იგულისხმება როგორც სამხრეთ კავკასია, ისე – ცენტრალური აზია. აქედან გამომდინარე, დასავლეთს სჭირდება გარკვეული ვადა იმისთვის, რომ მდგომარეობა ზუსტად შეაფასოს. ექვს თვეში რომ ის ძირეული ცვლილებები ვერ მოხდება, რაც რეგულაციებშია ჩამოთვლილი, ეს ფაქტია. შესაბამისად, მთავარი მიზეზია არა რეფორმები და დემოკრატიზაციის შენელებული ხარისხი, არამედ ის, რომ უკრაინის ომის ფინალზეა დამოკიდებული ყველაფერი: რა მდგომარეობაში იქნება ამ დროს რუსეთი, იქნება დამარცხებული, გამარჯვებული თუ დასუსტებული. რასაც დღეს ვუყურებ, მე მაინც მიმაჩნია, რომ ეს ომი არ არის ორიენტირებული რუსეთის განადგურებაზე, არამედ – მის დასუსტებაზე, რომ რუსეთი გახდეს ლოიალური დასავლეთის მიმართ. ამის შემდგომ უკვე შესაძლებელი იქნება სხვა ნაბიჯების გადადგმა დასავლეთის მხრიდან, ასე ჩანს“, – განაცხადა არეშიძემ.
პოლიტოლოგმა ხაზი გაუსვა, რომ არაერთი დასავლური სახელმწიფოს ლიდერებს არ ესმით, თუ რატომ არ შეიძლებოდა, საქართველოს მიეღო კანდიდატის სტატუსი.
„თუ დასავლური სახელმწიფოების რიგი ლიდერების ლოგიკას დავუკვირდებით, განსაკუთრებით – აღმოსავლეთ ევროპის, ვხედავთ, რომ ისინი ვერ ხვდებიან, რატომ არ შეიძლებოდა პატარა საქართველოსთვის კანდიდატის სტატუსის მინიჭება შექმნილ ვითარებაში, მით უმეტეს, რომ პოლიტიკური კონიუნქტურიდან გამომდინარე მოხდა უკრაინისა და მოლდოვასთვის კანდიდატის სტატუსის მინიჭება. ამიტომ, ვფიქრობ, გადაწყვეტილება იქნა მიღებული პოლიტიკოსთა ერთი ჯგუფის მიერ, რომელიც პოლიტიკურ ცენტრებზეა მიბმული და ის აანალიზებს მთლიანად სურათს, არამხოლოდ იმ პროცესებს, რაც საქართველოში, უკრაინაში თუ მოლდოვაში მიმდინარეობს“, – განაცხადა მამუკა არეშიძემ.
