საქართველო ნატოსთვის ძალიან ძლიერი პარტნიორია და ეს კარგად წარმოჩინდა მაღალი რანგის დელეგაციით, რომელიც საქართველოდან იყო წარგზავნილი ნატოში, მადრიდის სამიტზე, – ამის შესახებ საქართველოში აშშ-ის ელჩმა, კელი დეგნანმა ჟურნალისტებთან საუბრისას განაცხადა.
მისი თქმით, მადრიდის სამიტი კიდევ ერთხელ იყო დემონსტრირება ნატოს ალიანსის ერთიანობის, განსაკუთრებით რუსეთის მიერ გაჩაღებული სასტიკი და არაპროვოცირებული აგრესიის ფონზე.
„სამიტი იყო დასტური იმისა, რომ ნატო არის თავდაცვითი ორგანიზაცია, რომლის მიზნებს წარმოადგენს მშვიდობისა და სტაბილურობის უზრუნველყოფა ევროპაში და მის ფარგლებს გარეთ. საქართველოსთვის ეს იყო კარგი შანსი, ესაუბრათ, ხელახლა განეხილათ ის ნაბიჯები და რეფორმები, რაც უნდა განხორციელდეს ქვეყანაში ნატოსა და ევროატლანტიკური ინტეგრაციის კუთხით. ძალიან ბევრი რეფორმა ასევე პასუხობს იმ მოთხოვნებს, რაც ევროკავშირის წევრის კანდიდატის სტატუსისთვისაა მოთხოვნილი. ასე რომ აღნიშნული რეფორმების გატარება, რაც საჭიროა ევროკავშირის წევრობის კანდიდატის სტატუსის მისაღებად, ასევე ხელს შეუწყობს ნატოში ინტეგრაციის გზაზე საქართველოს პროგრესს. მოგეხსენებათ, ნატო პოლიტიკური და სამხედრო ორგანიზაცია, ალიანსია, ასე რომ, არა მხოლოდ სამხედრო კუთხით მზაობა, არამედ პოლიტიკური საკითხები არის ძალიან მნიშვნელოვანი“, – აღნიშნა ელჩმა.
მისი თქმით, აშშ და ევროპა ბოლო 30 წლის განმავლობაში ეხმარება საქართველოს პროგრესის მისაღწევად, განსაკუთრებით ევროატლანტიკური კუთხით და ამერიკის შეერთებული შტატები მზადაა გააგრძელოს საქართველოს დახმარება ამ პროგრესის მისაღწევად.
