ადამიანმა, რომელსაც ახლა გაგაცნობთ, საკუთარ ნიჭს გასაქანი პატიმრობის ათი წლის შემდგომ მისცა. გოგი აბაშიძე დღეს მხატვრობითაა დაკავებული და ქმნის ნამუშევრებს, რომლებიც სხვადასხვა თემატიკას ეხება.
გარდა იმისა, რომ გოგი ხატავს, ის ხელნაკეთ ნივთებსაც ამზადებს, რომლებსაც საერთო ხაზად საქართველო და მისი მახასიათებლები მიჰყვება. ის “თბილისი თაიმსს” თავად ესაუბრა.
“როდესაც მე პატიმარი ვიყავი, იქ მუშაობდნენ სოციალური მუშაკები. იქამდე არ ვხატავდი, ძალიან იშვიათად. ვხატავდი ვინმესთვის საჩუქრად ან მაშინ, როდესაც გოგონა მომეწონებოდა – მას ვხატავდი და ვჩუქნიდი.
მე სოციალურ მუშაკებს ვუთხარი, რომ ხატვა მეხერხებოდა. ვთხოვე, ტილო და საღებავები მოეტანათ და შემომიგზავნეს ეს ყველაფერი, დაუშვეს ამის უფლება. ძალიან ვიწრო წრეში, საკანში ვინც იყო – მათ თვალწინ, დავხატე, გამოვატანე სოციალურ მუშაკებს, რომლებმაც სოციალურ ქსელში გამოაქვეყნეს ჩემი ნახატი – ჩემმა ნამუშევარმა ერთერთ კონკურსში გაიმარჯვა. მერე ყველანაირად შემიწყეს ხელი. იქ ოთხმეტრიანი ტილო დავხატე, რომელიც ძალიან მაგარი გამოვიდა.
მას შემდეგ კი, რაც ციხე დავტოვე, უკვე დავიწყე შეფშებზე, ჩაიდნებზე ხატვა. ამ ყველაფერს ვაბარებ შარდენზე”, – ამბობს გოგი აბაშიძე.
