“ევროს გაუფასურება ჩვენთვის იმდენად არის საინტერესო, რამდენადაც ჩვენ ეკონომიკური და სავაჭრო ურთიერთობები გვაქვს ევროზონის ქვეყნებთან. წილობრივად, ევროკავშირის წილი ჩვენს ექსპორტში, დაახლოებით, 17 პროცენტია, ხოლო იმპორტის – 23 %-მდე”, – ამის შესახებ ეკონომიკის ექსპერტმა, იოსებ არჩვაძემ “თბილისი თაიმსთან” საუბრისას განაცხადა.
ექსპერტმა განმარტა, თუ როგორ აისახება საქართველოს ეკონომიკაზე ევროს გაუფასურება.
“აღსანიშნავია ერთი გარემოება, რომ ჩვენ დაახლოებით 140 ქვეყანასთან გვაქვს სავაჭრო ურთიერთობები და ბოლო პერიოდში ექსპორტი, გასაგები მიზეზების გამო. მკვეთრად შეგვიმცირდა უკრაინასა და რუსეთში. რამდენაც შემცირდა რუსეთთან ჩვენი ექსპორტი, დაახლოებით, 30 %-ით მეტად გაიზარდა ევროკავშირში. ამით რისი თქმა მსურს – რუსეთთან ყოველ 100 დოლარ შემცირებაზე ევროკავშირთან ჩვენ გავზარდეთ ექსპორტი 170 დოლარით, ეს არის ძალიან სერიოზული წარმატება იმიტომ, რომ ევროკავშირი არის საკმაოდ მაღალი მოთხოვნილებების მქონე სახელმწიფოთა გაერთიანება.
ასეთ პირობებში, როდესაც ზრდი ექსპორტს ევროკავშირში, ეს ნიშნავს, რომ საკმაოდ მაღალი კონკურენტუნარიანობა გაქვს. ეს უნდა იყოს დამატებითი სტიმულისა და მოტივაციის საფუძველი ჩვენთვის. დოლართან ევროს გაუფასურებას ჩვენთვის არ აქვს საციცოცხლო მნიშვნელობა, რადგან ჩვენ გავზარდეთ ექსპორტი იმ ქვეყნებშიც, რომლებთანაც ჩვენ ვვაჭრობთ ამერიკულ დოლარზე. მაგალითად, ჩვენ გავზარდეთ ექსპორტი ჩინეთშიც, თურქეთშიც და, თქვენ წარმოიდგინეთ, ორჯერ და მეტად – ამერიკის შეერთებულ შტატებში”, – განაცხადა იოსებ არჩვაძემ.
