მათთვის, ვისთვისაც ხარიხსი და განსხვავებული პროდუქცია ძალიან მნიშვნელოვანია, გამორჩეული უნარებისა და გემოვნების ადამიანები ქმნიან ნამუშევრებს. ამჯერად, გაგაცნობთ ფაზლებს, რომლებიც ე.წ. ფარნერებისგან იქმნება. დეტალურად, მის შესახებ „თბილისი თაიმსს“ ეკა თედიაშვილმა უამბო.
განსხვავებულ ფაზლებს ამზადებთ – მათ რა მასალისგან ქმნით?
ამჯერად, იდეების ძიებისას ინსპირაცია ჩემი შვილი აღმოჩნდა, რომელიც 4 წლისაა. მუდმივად ძიებაში ვარ, თამაშ-თამაშით სიახლეები შევასწავლო: საათის ცნობა, გეომეტრიული ფიგურები, ანგარიში, წელიწადის დროები და ა.შ. აქედან გამიჩნდა ფაზლების შექმნის იდეა. ვამზადებთ ე.წ. ფანერისგან. რადგან ფაზლები პატარებზეა გათვლილი, ვცდილობთ, გამოვიყენოთ ისეთი მასალა, რომელიც მეტად უსაფრთხო იქნება მათი ჯანმრთელობისა და სიცოცხლისთვის. რთულია ასეთი მასალის მოძიება, მაგრამ არ შევწყვეტთ ძიებას.
უმეტესად, რა თემატიკაზეა ისინი მორგებული?
უამრავი დანიშნულების საგნები გვაქვს უკვე შექმნილი და, ამასობაში, მივადექით იდეებს პატარების გასავითარებლად. ათმაგად სასიამოვნო აღმოჩნდა ასეთი ტიპის ნივთების შექმნის პროცესი.
რა სირთულეებთანაა დაკავშირებული პროცესი?
ზოგადად, ჩვენი საქმიანობის ერთ-ერთი ძირითადი პრობლემა მაინც შეკვეთის მიწოდებაა, მიწოდების სერვისის გაზრდილი ტარიფების გამო. მაგრამ მაქსიმალურად ვცდილობთ, ხელმისაწვდომ ფასად გავყიდოთ ნაწარმი, რომ ბევრმა შეძლოს შეძენა.
ბევრი ინტერესდება თქვენი ნამუშევრებით?
ასეთ გამოხმაურებას არც ველოდი, როდესაც იდეა დაიბადა.
ძალიან გამიხარდა, როდესაც დამიკავშირდა ერთი მომხმარებელი, რომელსაც პატარა ჰყავს, აუტისტური სპექტრის მქონე და დიდი შეკვეთა გააფორმა. ძალიან მოეწონათ, პატარას განსაკუთრებით. შემდეგ მოვიძიე სოციალურ ქსელში ასეთი პატარების მშობლების ჯგუფი და მათ შევთავაზე ჩემი ნამუშევრები. აღმოჩნდა, რომ განსაკუთრებით მათთვის ძალიან საინტერესო და საჭირო ნივთებს ვქმნით, ჩვენდა უნებურად. მომწერა ბევრმა მშობელმა შესაკვეთად. გამიზიარეს ახალი იდეები, თუ რის შეძენას ისურვებდნენ და სულ მალე გვექნება საბავშვო თემატიკის ძალიან ბევრი ფაზლის ტიპის ნაწარმი.
გარდა ამისა, რას ამზადებთ?
უამრავი თემატიკა გვაქვს შემოთავაზებული. ჯერ ზღვართან არ მივსულვართ. ყველა ნივთი გვაქვს შექმნილი, რისი ფანტაზიაც ჰქონია მომხმარებელს აქამდე. ჩვენითაც ვეძებთ იდეებს. ყველა დღესასწაულის თემატიკა მოვასწარით, დღემდე რაც ყოფილა. მოუთმენლად ველოდებით ახალი წლის სეზონს და დარწმუნებული ვარ, ბევრი ბედნიერი მომხმარებელი შეგვემატება.
