კონკურენციის ეპოქაში, ჩვენ ყოველდღიურად გვიწევს, გავაკეთოთ არჩევანი და გადავაფასოთ შემოთავაზებები, განსაკუთრებით მაშინ, როცა საქმე ბავშვებსა და მათთვის სათამაშოს შერჩევას ეხება – მშობლები ირჩევენ ხარისხიანსა და ორიგინალურს. „ააშენე შენით“ – გახლავთ შემოთავაზება ბავშვებისა და მოზარდებისთვის, რომლის იდეაც ძალიან საინტერესოა და ბავშვებისთვის – სასარგებლო. დეტალებზე, „თბილისი თაიმსს“ ქეთევან ოთიაშვილი, „ააშენე შენით“-ის დამფუძნებელი ესაუბრა.
დეტალურად, რას ითვალისწინებს თქვენი საქმიანობა?
ჩვენ ვქმნით ბავშვებისა და მოზარდებისთვის განკუთვნილ 3D კონსტრუქტორებს. ყველა ტიპის კონსტრუქტორი მოთავსებულია ხის სასაჩუქრე ყუთში და თან ახლავს ხეზე გრავირებული მისალოცი ბარათი. კონსტრუქტორები დამზადებულია ეკოლოგიურად სუფთა და ბავშვებისთვის უსაფრთხო მასალისგან, როგორიცაა: ხე, თაბაშირი, აკრილის საღებავები, საბავშვო არატოქსიკური წებო. კონსტრუქტორი გულისხმობს ხის მასალის სხვადასხვა დეტალის ერთმანეთთან დაკავშირებას თანდართული ინსტრუქციის მიხედვით, ისე – რომ ბავშვმა ააწყოს აივანი, კარ-ფანჟარა, სახურავი და ა.შ. გარდა ამისა, თაბაშირისგან დამზადებული მინიატურული აგურებისგან ბავშვებს შეუძლიათ, ააშენონ რეალურის ანალოგი მინიატურული სახლები. სახლს თან ახლავს განათების სისტემაც. ჩვენი 3დ კონსტრუქტორები ავითარებს ბავშვებსა და მოზარდებში: სივრცით აღქმას, ლოგიკურ აზროვნებას, მოტორიკა და ა.შ.
რა იყო ის ძირითადი მიზეზი, რის გამოც “ააშენე შენით” დაფუძნდა?
პირველ ყოვლისა, მინიატურული სახლების აშენება იყო ჩვენი ოჯახის ჰობი. მე 4 შვილი მყავს სხვადასხვა ასაკის და არაჩვეულებრივად ვერთობით თაბაშირისგან ყალიბების მეშვეობით მინიატურული აგურების დამზადებით და შემდეგ სხვადასხვა ნაგებობის შენებით. გადავწყვიტე, რომ ის, რაც ჩემს შვილებს ძალიან მოსწონთ, სხვა ბავშვებისთვისაც შემეთავაზებინა.
ძირითადად, რა ასაკობრივ კატეგორიაზე ის მორგებული?
ჩვენი პროფუქტი გათვლილია 3 წელს ზემოთ ასაკის ბავშვებისა და მოზარდებისთვის, თუმცა, ზრდასრული ადამიანებსაც შეუძლიათ, ისიამოვნონ მინიატურული შენობების შენების პროცესით. ჩვენი პირველი 2 პროდუქტი: მინიატურული სახლი აივნით და სათამაშოების მაღაზია გათვლილია 6 წელს ზემოთ ბავშვებისა და მოზარდებისთვის, რადგან შეიცავს ბევრ პატარა ხის დეტალს, რომელიც 3დ ფაზლივით ერთმანეთში ჯდება. თუმცა, უფროსების დახმარებით 3 წლის ასაკს ზემოთ ბავშვებიც შეძლებენ ამ სახლების აშენებას.
თუ გეგმავთ, სხვა სახის აქტივობების დამატებას?
ჩვენი შემდგომი 2 პროდუქტი, რომელსაც უახლოეს დღეებში დავდებთ ჩვენს ონლაინ მაღაზიაში, უფრო პატარა ასაკიდან – 3 წლიდან ბავშვებისა და მოზარდებისთვის იქნება განკუთვნილი. ეს 2 პროდუქტი იქნება ციხესიმაგრე და ავტოფარეხი. ასევე, უახლოეს მომავალში ვგეგმავ მინიატურული სახლებისთვის ავეჯის, “შპალერის” და სხვადასხვა აქსესუარის დამზადებას.
როგორ შეაფასებთ – გაამართლა თქვენმა იდეამ?
ჯერჯერობით, ბაზარზე სულ 2 კვირაა, რაც ვართ. წარმოდგენილი ვართ მხოლოდ ონლაინ მაღაზისს სახით. ამ ხნის განმავლობაში დიდი ინტერესი გამოვიწვიეთ, რაც კომენტარების და ზარების სახით ვლინდება. ვგეგმავთ ასევე ფიზიკურ მაღაზიებში ჩვენი პროდუქტის შეტანას და სხვადასხვა მარკეტინგული სვლით ჩვენი პროდუქტის ცნობადობის ამაღლებას.
