იუსტიციის სამინისტრომ და თბილისის მერიამ, დედაქალაქში სერვისების გაუმჯობესების მიზნით, თანამშრომლობის მემორანდუმი გააფორმეს.
მემორანდუმს ხელი მოაწერეს იუსტიციის მინისტრმა, თეა წულუკიანმა და თბილისის მერმა, დავით ნარმანიამ.
“თბილისის მერია და იუსტიციის სამინისტრო ძალიან მჭიდროდ ვთანამშრომლობთ. ჩვენ აქტიურად დავიწყეთ იუსტიციის სამინისტროს ელექტრონული სერვისების გამოყენება. ძალიან აქტიურად ვთანამშრომლობთ მონაცემთა გაცვლის სერვისებში, ელექტრონული მმართველობის სფეროში და მომავალში ვაპირებთ, რომ უფრო მეტად გავააქტიუროთ მუშაობა ამ თვალსაზრისით. თბილისის მერია გვინდა გავხადოთ უფრო მეტად თანამედროვე, ერთ სივრცეში სერვისების მიწოდებაზე მორგებული და ამ თვალსაზრისით გამართული ორგანიზაცია, რათა სწრაფად და ეფექტიანად მივაწოდოთ მოქალაქეებს ის აუცილებელი სერვისები, რაც ჩვენ კანონმდელობით გვაქვს გათვალისწინებული”, – განაცხადა დავით ნარმანიამ.
მისივე თქმით, მემორანდუმის მიზანია მოქალაქეების მაღალი სტანდარტით მომსახურება, საჯარო დაწესებულებების მოდერნიზაცია და ეფექტურობა.
“ჩვენ რამდენიმე თვეა მერიასთან ერთად ვთანამშრომლობთ იმ სფეროში, რასაც ჰქვია ელექტრონული დოკუმენტბრუნვის დანერგვა, რაც წინა მერის პირობებში ჩვენ მუნიციპალიტეტს და მის სერვისებს არ ჰქონდა. ჩვენ გადავდივართ თანამშრომლობის ახალ ეტაპზე. გადავწყვიტე, რომ ჩვენმა ორმა უწყებამ კიდევ უფრო გააღრმაოს თანამშრომლობა. აქ იგულისხმება თბილისელებისთვის სერვისის მიწოდების სფეროში უფრო მეტი კომფორტის შექმნა, მეტი ინოვაციების დანერგვა, მერიის სერვისების კვლევა, რომელსაც ჩვენ 3-4 კვირაში ჩავატარებთ”, – განაცხადა თეა წულუკიანმა.
