„ხელსაქმის სიყვარული ბებიისგან მომყვება“ –  ქეთევან ქარჩავა

დღეს ალბათ აღარავინ კამათობს იმაზე, რომ მრავალთაგან მოთხოვნადი და სასურველია ის, რაც გამორჩეულია. შესაბამისად, უფრო მეტად წარმატებულია ის ხელოვანი, რომელიც ფიქრობს და შრომობს იმისთვის, რომ შექმნას განსაკუთრებული. ქეთევან ქარჩავა სწორედ მათ რიგს მიეკუთვნება. მისი აქსესუარები ხარისხით, გემოვნებითა და სილამაზით გამოირჩევა. დეტალურად, „თბილისი თაიმსს“ ქეთევანი თავად ესაუბრა.

დავამთავრე ელექტრონული კომერციის აკადემია, საკმაოდ წარმატებულად. ამან ძალიან დიდი წვლილი შეიტანა ჩემ განვითარებაში. ეს იყო ოთხთვიანი ინტენსიური კურსი და მოიაზრებდა ფუნდამენტურ ასპექტებს და ა.შ. ეს ძალიან გამომადგა. შემდეგ მივიღე მონაწილეობა “აწარმოე საქართველოს” პროექტში და მივიღე დაფინანსება. ახლა ველოდები ჩემი პროდუქციის წარმოებისთვის საჭირო ახალ დანადგარებს.

კონკრეტულად, რას ამზადებთ?
მე ვამზადებ ხელით მოქარგულ, ხავერდის, ქალის აქსესუარებს. თუმცა, ხავერდი არ არის ერთადერთი მასალა, რომელზეც მე ვქარგავ. ასევე, ვიყენებ ტილოსა და სხვა ქსოვილებს. ვამზადებ ჩანთებს, თავსაბურავებსა და სამკაულებს.

რამ განაპირობა თქვენი ინტერესი ხელსაქმის მიმართ?
ხელსაქმის სიყვარული ბებიისგან მომყვება. მას უყვარდა ქარგვა და ბავშვობიდან ჩარჩენილი მაქვს ეპიზოდები, როდესაც ჩემთვისაც ქარგავდა სამოსს. ვიყავი დიასახლისი, არ ვმუშაობდი არსად, შესაბამისად, მქონდა თავისუფალი დრო, რომ ჩემი საყვარელი საქმიანობა განმევითარებინა. თუმცა, დავიწყე არა ქარგვით, არამედ – სხვადასხვა რამის კეთებით. მაგალითად, ვმუშაობდი თექაზე. ნელ-ნელა, ეტაპობრივად გადავედი თექაზე მუშაობიდან ქარგვაზე. ამაში ძალიან დიდი წვლილი შეიტანა ტრადიციული რეწვის ასოციაციამ, რადგან პირველად სწორედ მათ შემომთავაზეს ხავერდის საყელოზე მოქარგვა. ძალიან ლამაზი ნამუშევრები გამოვიდა. საყელოდან გადავედი ჩანთაზე და ა.შ. ამჟამად, აბრეშუმის თავსაბურავები იქარგება ჩემთან, ძირითადად, ასევე – ყაბალახები.

როგორ ფიქრობთ, რა გამოარჩევს თქვენს ნამუშევრებს?
ძალიან დიდი ხანია, ეს ნიშა დავიკავე. ვიყავი ერთერთი პირველი, ვინც აღნიშნული საქმიანობა წამოიწყო. ვფიქრობ, ჩემი ხელწერა გამოირჩევა იქედან გამომდინარე, რომ  ვმუშაობ უმაღლესი ხარისხის მასალით და ვცდილობ, მქონდეს საკუთარი კომპოზიციები – არ ვმეორდებოდე. ამასთან, არ ვიყენებ შაბლონებს და ვცდილობ, ნამუშევრები იყოს სინთეზური, სხვადასხვა მასალისგან დამზადებული. ვიყენებ ბისერებს, აბრეშუმის ძაფებს და სხვადასხვა მასალას. მიმაჩნია, რომ ყველაფერი მაინც დამოკიდებულია ხარისხზე.

ამჯერად, საქმიანონის რა ეტაპზე ხართ?
ვცდილობ ახალი ნიშის პოვნასა და განვითარებას ისევ ქარგვის მიმართულებით. ეს ყველაფერი იქმნება ისევ იმ ადამიანებისთვის, რომლებსაც უყვართ მოქარგული ნივთები და სურთ, სახლში დეკორატიული ნივთებიც ჰქონდეთ. ჩემს პროდუქციაზე მოთხოვნის ზრდამ ასევე განაპირობა გუნდის შექმნის აუცილებლობა. ამყავს მოსწავლეები, რომლებსაც უფასოდ ვასწავლი ქარგვას და ისინი შემდგომ მოიაზრებიან ჩემს თანამშრომლებად. ასევე, მონაწილეობას ვიღებ “ეთნოფესტ 2022”-ში. ეს არის ხელნაკეთი ნივთების საერთაშორისო გამოფენა “ექსპო ჯორჯიაში”. გარდა ამისა, მაქვს სხვადასხვა შემოთავაზება, რომლებზეც წინასწარ ვერ ვისაუბრებ.