იმის გამო, რომ სამყარო ყოველდღიურობის გამარტივებისა და გახალისებისკენ მიისწრაფვის, თანაც ისე, რომ ხარისხი შენარჩუნდეს, პროდუქციის მომწოდებლები ფიქრობენ იმაზე, თუ რა და როგორ შესთავაზონ მომხმარებლებს. „კეკრი“ ონლაინ რესტორანია, რომელიც ადგილზე გაყიდვებს არ აწარმოებს. ის საზოგადოებას სთავაზობს ლანჩ-ბოქსებს სასურველ მისამართზე მიტანით. კომპანია დაარსდა 2022 წლის მაისში. უფრო დეტალურად, „თბილისი თაიმსს“ „კეკრის“ დამფუძნებელი, ხათუნა გოლეთიანი ესაუბრა.
რას სთავაზობთ მომხმარებლებს?
მომხმარებელს ვთავაზობთ ლანჩ-ბოქსებს ადგილზე მიწოდებით – ეს გახლავთ დიდი ბოქსები, რომლებიც გათვალილია 4-6 პერსონაზე და ინდივიდუალური ბოქსები, რომლებიც გათვლილია ერთ ადამიანზე. თითოეულ დიდ ბოქსში შედის 6 დასახელების პროდუქტი/ხემსი და 3 დასახელების სოუსი, ხოლო ინდივიდუალურ ბოქსებში – ერთი დასახელების პროდუქტი/ხემსი და ერთი დასახელების სოუსი.
ასევე, მომხმარებელს ვთავაზობთ ასაწყობ ლანჩ-ბოქსებს, რაც იმას ნიშნავს, რომ ჩვენი მენიუდან თავად ირჩევენ, რომელი 6 სახეობის ხემსი და 3 სახეობის სოუსი მოათავსონ მათთვის სასურველ ბოქსში. ბოქსები შედგება მშრალი საკვებისგან და მოსახეხრებელია მისართმევად ყოველგვარი თეფშის და ჩანგლის გარეშე. ისინი გაფორმებულია ისე ლამაზად, რომ პირდაპირ შეიძლება, მოთავსდეს სუფრაზე და არ საჭიროებს დამატებით სერვირებას.
ამჟამად, მენიუში გვაქვს 18 დასახელების პროდუქტი და 8 დასახელების სოუსი, თუმცა, უახლოეს მომავალში კიდევ ვაპირებთ რამდენიმე სახეობის დამატებას, რათა უფრო მრავალფეროვანი მენიუ შევთავაზოთ მომხმარებელს. დიდი ბოქსები მოსახერხებელია ნებისმიერი ტიპის შეკრებებისთვის, ეს იქნება ტრენინგი, დაბადების დღე თუ სხვა ნებისმიერი სახის წვეულება. მინი/ინდივიდუალური ბოქსები კი განკუთვნილია ოფისში ან სახლში ლანჩისთვის. წვეულებებისათვის შესაძლებელია წინასწარ შეკვეთა.
მომხმარებელი პროდუქტს უკვეთავს „დელივერი“ აპლიკაციების მეშვეობით, შესაბამისად, მიწოდებასაც უზრუნველყოფს პარტნიორი დელივერი კომპანია. ასევე, შეკვეთებს ვიღებთ „ფეისბუქ“ ან „ინსტაგრამ“ მესენჯერით და ჩვენ უზრუნველვყოფთ ადგილზე მიტანას ან თავად მომხმარებელს მიაქვს ობიექტიდან. კომპანიის მიზანია, იყოს მაღალი ხარისხის საკვები პროდუქტის მწარმოებელი და სნექ/ლანჩ ბოქსების მიმწოდებელი კომპანია საქართველოს მასშტაბით.
რატომ გადაწყვიტეთ, საქმიანობა ამ მიმართულებით წამოგეწყოთ?
პანდემიამ, ისევე, როგორც რესტორნებს, მომხმარებლებს ნათლად დაანახა საკვების მიწოდების სერვისის უპირატესობა, რამაც გაზარდა მოთხოვნა საკვების მიწოდების სერვისზე. საკვების მიწოდების სერვისს რამდენიმე უპირატესობა აქვს – სწრაფი და მოსახერხებელია, რითაც იზოგება მომხმარებლის დრო, ენერგია და ფული.
ზოგადად, ბოქსების მიწოდების სერვისი ძალიან პოპულარულია ევროპასა და ამერიკაში. მსგავს სერვისზე მოთხოვნა მზარდია საქართველოშიც. საქართველოში (კერძოდ, თბილისში) უკვე რამდენიმე კომპანია სთავაზობს მომხმარებლებს დესერტების (ტკბილეულის) ბოქსებს, რომლებიც საკმაო პოპულარობით სარგებლობს მოსახლეობაში. სწორედ ამან გვაფიქრებინა, რომ კარგი იქნებოდა მსგავსი ტიპის საკვები პროდუქტების ბოქსების შექმნა.
საკვები პროდუქტების მიწოდებაზე მოთხოვნის ზრდა და დესერტების ბოქსების პოპულარობა გახდა „კეკრის” შექმნის ინსპირაცია.
რამდენად ხშირად გაქვთ სიახლეები?
„კეკრი“ ჯერ სულ რაღაც 5 თვის შექმნილია და უკვე შევთავაზეთ მომხმარებლებს რამდენიმე სიახლე. ჯერ გვქონდა მხოლოდ დიდი ლანჩ-ბოქსები, შემდეგ დავამატეთ მინი/ინდივიდუალური ბოქსები და შემდეგ – ასაწყობი ბოქსები. ასე რომ, საკმაოდ ხშირად შეგვაქვს სიახლეები როგორც მენიუში, ასევე, მიწოდების ფორმებში. შესაბამისად, მომხმარებლებს სიახლეებს ვთავაზობთ დაახლოებით 2 თვეში ერთხელ.
ამ ეტაპზე, რა უახლოესი გეგმები გაქვთ?
ძალიან მალე, კომპანიებს და მათ თანამშრომლებს შევთავაზებთ კორპორატიულ ბოქსებს, ყოველთვიური სააბონენტო გადასახადის სანაცვლოდ. თანამშრომელი გადაიხდის ყოველთვიურ სააბონენტო გადასახადს და ყოველდღე სამუშაო ადგილას მიიღებს სხვადასხვა ლანჩ-ბოქსს, წინასწარ შეთანხმებული ყოველკვირეული მენიუს შესაბამისად.
ასევე, ვგეგმავთ ტკბილეულის ბოქსების დამატებასაც.
დიდი მოთხოვნაა მსგავსი ტიპის სერვისზე ქუთაისიდან და ბათუმიდან, ამიტომ, მომავალში ვეცდებით, ამ რეგიონებშიც შევქმნათ ფილიალები და არ დავწყვიტოთ გული ქუთაისელებს და ბათუმლებს.
