ჩვენ გარშემო არაერთი ადამიანია, რომელიც საყვარელ საქმიანობას იმ მომენტში არსებული გარემოებების გათვალისწინებით პოულობს. ასეთ დროს მოცემულობები გვიბიძგებს, ვიფიქროთ, რა ინტერესები და უნარები გვაქვს.
ნინო კლერტიაშვილი უკვე მესამე წელია, რაც “კუნძებს” ქმნის. ეს გამორჩეული, ფერადი საქმიანობა მისთვის, შეიძლება ითქვას, ცხოვრების ახალ ეტაპად იქცა – ბავშვების გამო, მას მოუწია ფიქრი იმის შესახებ, თუ რის გაკეთებას შეძლებდა შინ ყოფნის პარალელურად. საკუთარ ისტორიას ნინო „თბილისი თაიმსს“ უყვება.
„კუნძები არის ხის პატარა მორები, რომლებიც იჭრება, მუშავდება და მხოლოდ ამის შემდეგ ხდება მათი მოხატვა. კუნძების შექმნის იდეა მაშინ გამიჩნდა, როცა პატარა შვილის გამო ძირითადი დროის გატარება სახლში მიწევდა, გადავწყიტე, რომ “რამე” უნდა გამეკეთებინა და ეს “რამე” მაშინ კუნძები აღმოჩნდა“.
როგორც რესპონდენტი აღნიშნავს, თუკი მომხმარებელს აქვს საკუთარი იდეა, როგორი უნდა იყოს სასურველი კუნძი, ის ითვალისწინებს მას.
„ძირითადად, ჩემი გემოვნებით ვხატავ, მიყვარს ფერები და ვცდილობ, კუნძებიც მაქსიმალურად ფერადი იყოს. არის შეკვეთებიც, როდესაც ადამიანებს მნიშვნელოვანი ნახატის, წარწერის ან დეტალის გადატანა სურთ კუნძზე, სამახსოვროდ.
მივხვდი, რომ ძალიან მიყვარს ხელნაკეთი ნივთების შექმნა, სასწაული შეგრძნებაა, როცა შენს შექმნილს უყურებ და მოგწონს. ამიტომ, წელს ახალი პროდუქტი, “მილაკი” შევქმენი ჩემს მეგობართან ერთად, ეგრედ წოდებული სანტექნიკის მილებისგან ულამაზეს და უფერადეს სანათებს ვამზადებთ.
ძალიან დიდი იმედი მაქვს, რომ არც ეს იქნება ბოლო, კიდევ მოვა ახალი იდეები, განვვითარდები და შემდეგ ინტერვიუზე უკვე ჩემს საკუთარ სახელოსნოში გიმასპინძლებთ“, – ამბობს ნინო კლერტიაშვილი.
