“რუსეთი არის მსოფლიოში პირველი, ხორბლის მიმწოდებელი რაოდენობრივად. შესაბამისად, ხორბლის ფასი გაძირებისკენ არის მიმართული. ჩვენ რაც შეგვეხება – ბოლო პერიოდის განმავლობაში მცურავი ბაჟის ფასი იყო შემცირებული, ჩამოსული იყო 30 დოლარზე. ცნობისთვის, ეს არის ყოველკვირეული ბაჟი. ახლა უკვე ეს თანხა ასულია 47 დოლარზე, ანუ 30-ზე რომ იყო ჩამოსული, ფაქტობრივად, ამან მოგვცა შესაძლებლობა, რომ წისქვილკომბინატები ამუშავებულიყო და გარკვეული მარაგები ქვეყანაში შექმნილიყო”, – ამის შესახებ ხორბლისა და ფქვილის მწარმოებელთა ასოციაციის დირექტორმა, ლევან სილაგავამ “თბილისი თაიმსთან” საუბრისას განაცხადა.
სილაგავამ რუსეთის მიერ ხორბალზე საექსპორტო გადასახადის გაზრდის შესახებ ისაუბრა.
“ზოგადად, ეს ორთვიანი მარაგებია. მათ შორის, ფასის მხრივ გარკვეული სტაბილიზაცია ჯერჯერობით იქნება ხორბალზე, ფქვილსა და პურზე. თუმცა, ახლა უკვე მსოფლიო ბაზარზე გაძვირებული ხორბალი შემოვა ჩვენთანაც. გარდა ამისა, როდესაც ხორბლის მცურავი ბაჟი მატულობს ხოლმე, ეს ნიშნავს, რომ ხორბლის შემოტანას აზრი ეკარგება და ფქვილის იმპორტით ჩანაცვლდება, სავარუადოდ. ეს ნიშნავს, რომ უფრო მეტად ფქვილზე დამოკიდებულები გავხდებით, რაც მარაგების მხრივ არ არის კარგი ტენდენცია. გამოწვევა არის ის, რომ, ასეთ შემთხვევაში, წისქვილკომბინატები გაჩერდება.
ჩვენ ვფიქრობთ, რომ ისევ ფქვილის იმპორტზე მოგვიწევს გადასვლა, რაც არ არის კარგი. თუ გავითვალისწინებთ წინა წელს, როდესაც ფქვილის იმპორტმა ჩაანაცვლა ხორბლის იმპორტი, ეს გაკეთდა იმისთვის, რომ პურის ფასი არ გაზრდილიყო. თუმცა, ვნახეთ, რომ პურის ფასი მაინც გაიზარდა – სამ ეტაპად. თვითო პურის ფასის დაცვა უნდა მოხდეს მარაგებიდან გამომდინარე, ვიდრე ისევ ფქვილის იმპორტზე გადასვლით. ამ უკანასკნელმა წინა შემთხვევაში ეფექტურად ვერ იმუშავა. შესაბამისად, მთავრობისგან ველით გადაწყვეტილებას, რომ, გარკვეულწილად. პრიორიტეტში აიყვანოს ადგილობრივი წისქვილების მუშაობა. ამ შემთხვევაში, ჩვენ გარანტიას ვიძლევით, რომ პურის ფასს უფრო ეფექტურად დავიცავთ”, – განაცხადა ლევან სილაგავამ.
