“2009 წელს დავამთავრე უნივერსიტეტი, ბიზნესის ადმინისტრირების ფაკულტეტი. 2010-დან 2013 წლამდე ვმუშაობდი უკრაინულ ბანკში. შემდგომ წლებში რამდენიმე დიდი კომპანიის ამბასადორი და სოც. მედია მენეჯერი ვიყავი. 2020 წელს გამოცხადდა მორიგი საგრანტო კონკურსი “აწარმოე საქართველო”-სი, რომლის ბიუჯეტი საკმაოდ გრაციოზულად ჟღერდა – 40 მლ ლარი, შესაბამისად, ჩემი ყურადღებაც მიიპყრო” – ეს იმ ადამიანის ბიოგრაფიის ნაწილია, რომელიც დღეს ერთერთი ყველაზე გამორჩეული, ხალხმრავალი და საინტერესო ჯგუფის – “აწარმოე ქართული“-ს ადმინია.
ირაკლი ჯაბუას აქვს საკუთარი ისტორია, თუ როგორ მივიდა ამ ჯგუფის შექმნის გადაწყვეტილებამდე, რას ისახავს ის მიზნად და, ზოგადად, რა დეტალებს აერთიანებს.
“გადავწყვიტე, ჩემს ქალაქში – ზუგდიდში გამეხსნა ვიდეოთამაშების play room -ი და დავიწყე გრანტთან დაკავშირებით ინფორმაციის მოძიება. მაქვს ჯგუფების შექმნის და მართვის დიდი გამოცდილება, ეს ჩემი პირველი ჯგუფი არ არის, შესაბამისად, გადავწყვიტე, გამეხსნა ამ თემასთან დაკავშირებული ჯგუფი, სადაც ჩვენ – პოტენციური ბენეფიციარები საგრანტო კონკურსის ინფორმაციას გავუცვლიდით ერთმანეთს. აქედან დაიწყო ყველაფერი. სულ რამდენიმე თვეში 10 000 წევრამდე ავედით და გახდა პიპერაქტიური ჯგუფი – არა მარტო ინფორმაციის გაცვლა ხდებოდა, არამედ მეწარმეებმა დაიწყეს თავიანთი ნამუშევრების დადება ჯგუფში და მიიღო ის სახე, რაც აქვს დღეს. დღეს უკვე თითქმის 65 000 წევრია ჯგუფში გაერთიანებული და მათი რაოდენობა ყოველდღიურად იზრდება. ჯგუფში იდება ქართველი მეწარმეების ნამუშევრები, სერვისები, არის პოსტები ასევე ჰორეკა და ჰოსპიტალიტის ბიზნესების წარმომადგენლების, აპიარებენ თავიანთ სასტუმროებს, რესტორნებს და ა. შ. ასევე, საგანმანათლებლო სფეროც აქტიურად ჩართულია. მიმდინარეობს ასევე საკმაოდ დიდი დოზით ინფორმაციის გაცვლა ბიზნესთან დაკავშირებით”.
როგორც ირაკლი “თბილისი თაიმსთან” საუბრისას აღნიშნავს, ორ წელზე მეტია, რაც ჯგუფი არსებობს და მას აქტიურად იყენებენ ქართველი მეწარმეები, ხელოვანები და სხვა.
“თითქმის 2 წელზე მეტია, ჯგუფი უკვე არსებობს და 2 წელზე მეტია, ქართველი მეწარმეები ამ ჯგუფს აქტიურად იყენებენ – არა მხოლოდ მეწარმეები, ასევე, სხვა ჯგუფის წევრებიც, რომლებიც არიან პოტენციური მყიდველები, ახდენენ მეწარმეებთან დაკავშირებას ჯგუფის გავლით და მათი პროდუქციის შეძენას. მე პირადად მსიამოვნებს და ძალიან მახარებს მათი მხარდაჭერა და ყველას უანგაროდ ვუდგავარ გვერდში, ვარ მათი მეგობარი და ჯგუფის კარგი (😁) ადმინი”.
ირაკლის თქმით, ჯგუფს – “აწარმოე ქართული” უნდა შეუერთდეს ყველა, ვისაც ახარებს ქართული საქმის წარმატება.
“ვისაც საქართველო უყვარს და ახარებს ქართული საქმის წარმატება, ყველა უნდა შემოგვიერთდეს, არა მხოლოდ მეწარმეები ბიზნესის გაპიარებისთვის, არამედ – ჩვეულებრივი მოქალაქეები. ერთად უნდა ვაკეთოთ ქართული საქმე, რაც გამოიხატება ქართული ნაწარმის შეძენასა და დაფასებაში. სწორედ ამ ქართულ საქმეს ემსახურება ეს ჯგუფი და მე პირადად ძალიან ამაყი და ბედნიერი ვარ იმით, რომ ასობით და ათასობით ნიჭიერი მეწარმე გვყავს, რომლებიც საოცარ ნივთებს ამზადებენ. ასევე ბევრი წარმომადგენელიც გვყავს ხელოვნებიდან, რომლებიც საოცრად ხატავენ, ქმნიან შედევრებს, გვიზიარებენ და მოვყავართ აღტაცებაში. თითქმის ყველა სფეროს წარმომადგენლები არიან ჯგუფში, არ მინდა, ვინმე გამომრჩეს, რომლებიც საოცარ რამეებს ქმნიან და ჩვენც გვახარებს მათი შემოქმედების ერთ სივრცეში ხილვა. ვემსახურებით ყველა ერთად ქართულ საქმეს. შემოგვიერთდით და ერთად ვაკეთოთ ქართული საქმე”.
