“თაფლი ლეჩხუმიდან” – ეს იმ კომპანიის სახელწოდება გახლავთ, რომლის ისტორიაც ძალიან ბევრი წლის წინ დაიწყო. ბაბუის დაწყებულ საქმიანობას დღეს შვილიშვილები – გვანცა და გიგა ჭაბუკიანები ძალიან დიდი სიყვარულითა და შრომით აგრძელებენ. ლეჩხუმში, სოფელ დეხვირში ისინი სხვადასხვა პროდუქციას აწარმოებენ – რამდენიმე სახეობის თაფლს, ყვავილის მტვერს, ფუტკრის რძეს, დედა ფუტკარს, პროპოლისს, თაფლის საპონს, ასევე – მუშაობენ რამდენიმე ახალ პროდუქტზე. უფრო დეტალურად, “თბილისი თაიმსს” გვანცა ჭაბუკიანი ესაუბრა.
როგორია კომპანიის შექმნის ისტორია?
კომპანია ,,თაფლი ლეჩხუმიდან” დავაფუძნეთ მე და ჩემმა ძმამ, გიგა . მეფუტკრეობა ოჯახის ტრადიცია იყო და ჩვენც პატარაობიდანვე ვყავდით ბაბუს ჩართულები ფუტკართან მუშაობაში. ეს მშრომელი მწერი პატარაობიდანვე შევიყვარეთ, ყოველთვის გვსურდა ჩვენი მეფუტკრეობის განვითარება. ამჟამად, გვაქვს თაფლის გადამამუშავებელ საწარმო, რომელიც მუშაობს მზის პანელებით. მზის პანელებით სარგებლობა ჩვენთვის ქმნის შესაძლებლობას, ავითვისოთ ენერგიის ამოუწურავი რესურსი, გარდავქმნათ ის ელექტროენერგიად, დამატებით კი, ეკოლოგიაზეც ვიზრუნოთ, გაზაფხულიდან ჩვენი საწარმო ადგილობრივ მეფუტკრეებს მოემსახურება და შესთავაზებს სერვისს.
რით გამოირჩევა თქვენი პროდუქცია?
ჩვენ თაფლს ვაწარმოებთ მაღალმთიან რეგიონში, სადაც პესტიციდებით არ იწამლება ხეხილი, ვიყენებთ ბიოპრეპარატებს და სამომავლოდ ვგეგმავთ ბიომეურნეობაზე გადასვლას.
გვინდოდა, ჩვენი პროდუქცია განსხვავებული ყოფილიყო, ამიტომ, შეფუთვას ვახდენთ ხელით ნაქარგი ნამუშევრებით და უკვე თითქმის ევროპის ყველა ქვეყანაში გავაგზავნეთ სასაჩუქრედ. ამავდროულად, ბავშვებს ვაყვარებთ და ვასწავლით მეფუტკრეობას, ვგეგმავთ სხვადასხვა პროექტს და ვმასპინძლობთ სკოლის მოსწავლეებს. ჩვენი საწარმო იქნება ცოდნის გამავრცელებელი, მოეწყობა გამოფენები, ტრენინგები…
საქართველოს სრულად მოიცავთ?
ამჟამად, ჩვენი პროდუქცია სავაჭრო ქსელებში არ გვაქვს შეტანილი, გვაქვს მოლაპარაკებები სხვადასხვა სავაჭრო ქსელთან და სამომავლოდ ვგეგმავთ შეტანას. ამ ეტაპზე, ჩვენ ვაგზავნით ჩვენს თაფლს ქუთაისში, თბილისში, ბათუმში, კახეთში, სამარშუტო ავტობუსებით ვახდენთ მიწოდებას. ვანვითარებთ ფუტკრის ტურიზმს ჩვენს რეგიონში.
სამომავლოდ, რა გეგმები აქვს კომპანიას?
ჩვენ არ ვაპირებთ გაჩერებას, ვვითარდებით ყოველთვის და სამომავლოდ დიდი გეგმები გვაქვს მეფუტკრეობასთან დაკავშირებით – ჩვენი სოფლის, ჩვენი ლეჩხუმის განვითარებისათვის.
