„ლუკა პოლარეს“ გულშემატკივრებისა და ნაყინის მოყვარულთათვის, სულ რამდენიმე დღის წინ სიახლის შესახებ გახდა ცნობილი – კომპანიამ ბიონაყინის წარმოება დაიწყო. მალევე, მის მიმართ ინტერესი აშკარა გახდა და მოთხოვნა ყოველდღიურად მზარდია. დეტალურად, „თბილისი თაიმსს“ „ლუკა პოლარეს“ საზოგადოებასთან ურთიერთობისა და მარკეტინგის ხელმძღვანელი, ანი ციცქიშვილი ესაუბრა.
„ეს არის ბიონაყინი, რომელიც აქამდე საქართველოსა და ჩვენს რეგიონში არ არსებობდა. ამ მხრივ, ჩვენ მუშაობა წინა წელს დავიწყეთ. ბიოპროდუქტი გულისხმობს იმას, რომ ნაყინის შემადგენელი ყველა პროდუქტი არის ბიო და აკმაყოფილებს ბიო სტანდარტებს – ანუ, ყველა პროდუქტს აქვს ბიოსერტიფიკატი.
პროდუქტი, რაც ჩვენ ჩავუშვით, არის შტოში, კენკრის ნაყინი. ეტაპობრივად, გვექნება სხვადასხვა სახეობა. ესეც არის ჟელატოს ტიპის, ბუნებრივი ტიპის ბიო ნაყინი. ამისთვის, ცხადია, კომპანიას მოუწია ინვესტიციის გაღება – დაახლოებით, 50 000 ლარის ოდენობით, რადგან ბიონაყინის დამზადებას დანადგარები სჭირდება. გარკვეული პერიოდის მუშაობის შემდეგ, 10 ნოემბერს ჩავუშვით ჩვენს ქსელში ბიონაყინი.
საზოგადოების მხრიდაბ ინტერესი არის ძალიან დიდი. ბოლო პერიოდში ბიოპროდუქტებზე ძალიან აქტიურია კამპანიები. ჩვენს შემთხვევაშიც, ეს ყველაფერი ძალიან საინტერესო აღმოჩნდა, მაგრამ საზოგადოებას არაერთი შეკითხვა გაუჩნდა. მათ აინტერესებთ, რას ნიშნავს ბიონაყინი და ა.შ. ვფიქრობთ, ახალი სეზონიდან, როდესაც კიდევ სხვა გემოებს დავამატებთ, ინტერესი კიდევ უფრო მეტად გაიზრდება“, – აღნიშნა ანი ციცქიშვილმა.
