ფინანსთა მინისტრმა, ლაშა ხუციშვილმა პარლამეტში 2023 წლის სახელმწიფო ბიუჯეტის პროექტის წარდგენისას განაცხადა, რომ სოცდაუცველთა საზოგადოებრივი სამუშაოების პროგრამა შეიძლება, კონტროლის მექანიზმების უფრო მეტად გაძლიერებას საჭიროებდეს.
როგორც მინისტრმა აღნიშნა, ამ მხრივ, სახელმწიფოს მხრიდან მზაობა უკვე არსებობს და გარკვეული ნაბიჯების გადადგმაც იგეგმება.
ამ საკითხს “თბილისი თაიმსთან” საუბრისას ეკონომიკის ექსპერტი, იოსებ არჩვაძე გამოეხმაურა. ექსპერტმა განმარტმა, თუ რატომ არის საჭირო აღნიშნული მექანიზმების გადახედვა.
“როდესაც სახელმწიფო იღებს გარკვეულ პასუხისმგებლობასა და ვალდებულებას ამა თუ იმ სოციალური კატეგორიის ადამიანთა დახმარებისთვის, ეს ნიშნავს, რომ ეს დახმარება უნდა იყოს მიმართული მხოლოდ მათკენ, ვისაც ეს მართლა სჭირდება. ეს ხომ კერძო ფონდი არ არის – ეს არის სახელმწიფოს საბიუჯეტო სახსრები, რომელთა გამოყენების მიზანმიმართულობა განსაზღვრულია კანონმდებლობით.
ამიტომ, საჭიროა მონიტორინგი, რათა დავინახოთ, მართლა იმ კატეგორიას გადაეცემა თუ არა თანხა, რომელიც ამ პროგრამით არის გათვალისწინებული და იმისთვის, რომ მისი გამოყენება მოხდეს დადასტურების შემთხვევაში”, – განაცხადა იოსებ არჩვაძემ,
საქართველოს პრემიერმინისტრის, ირაკლი ღარიბაშვილის ინიციატივით დაწყებული სამთავრობო პროგრამა, რომელიც შრომისუნარიანი, სოციალურად დაუცველი მოსახლეობის დასაქმებას ითვალისწინებს, უკვე 8 თვეა – ძალაშია. აღნიშული პროგრამის ფარგლებში, ქვეყნის მასშტაბით 23 000 მეტი სამუშაო ადგილი გამოიძებნა.
