ხელოვნებას, ხელსაქმეს, საოცარ იდეებს რადგან საზღვარი არ გააჩნია, ჩვენც ყოველდღიურად გვაოცებს ამა თუ იმ ხელოვანის მიერ შექმნილი ნამუშევრები, მათი ფანტაზია… ხათუნა ბებურიშვილი და თამუნა ლორია ვიტრაჟული ხატვით არიან დაკავებულები. ეს ძალიან ლამაზი მიმდინარეობაა, რომელიც სხვადასხვა ნივთს განსაკუთრებულს ხდის. „თბილისი თაიმსს“ ხათუნა ბებურიშვილი ესაუბრა.
„რომ გითხრათ, ბავშვობიდან ვხატავ-მეთქი, მთლად ასეც არაა. ხატვა ზრდასრულ ასაკში მოვიდა ჩემთან. თუმცა, ყოველთვის მიყვარდა ფერებით გართობა და მაინტერესებდა ფერთა გრადაცია. ალბათ, ამიტომაც, განსაკუთრებით მიტაცებდა იმპრესიონისტთა შემოქმედება. ერთფეროვნება არასდროს მაკმაყოფილებდა, ისევე – როგორც თამუნას. ორივე მუდამ ვეძებდით ახალს და უცხოს. ასე ვიპოვეთ ვიტრაჟული ხატვა და აღმოვაჩინეთ ერთმანეთი. ვფიქრობ, საინტერესო კოლაბორაცია გამოგვივიდა“
როგორც ხათუნა აღნიშნავს, საქართველოსი ვიტრაჟული ხატვა, ჯერჯერობით, სიახლეა, ქვეყანაში არც საჭირო საღებავები იშოვება.
„ვიტრაჟული ხატვა ჩვენს ქვეყანაში, ჯერჯერობით, სიახლეა. უფრო თიხასა და ხეზე მუშაობენ, ხატავენ. შუშა ჯერ კიდევ სიახლეა. არც საღებავები იშოვება, ჩვენ უცხოეთში ვყიდულობთ, ჩამოტანაზეც ვწვალობთ. საღებავი უნდა იყოს აუცილებლად მაღალი ხარისხის, ეკოლოგიურად სუფთა და ტექნოლოგიურად მდგრადი. შესაბამისად, საზოგადოება ახლა ეცნობა ამ ტექნიკას. მოთხოვნაც შესაბამისია. ნახულობენ, აღფრთოვანდებიან, ყიდულობენ და ასე ვეცნობით ერთმანეთს“
ხათუნა ბებურიშვილის თქმით, მათ მიერ შექმნილი ყოველი ნივთი ექსკლუზიურია და არ მეორდება.
„ფაქტობრივად, ყოველი ჩვენი შექმნილი ნივთი ექსკლუზიურია, ერთადერთი და არ აქვს ანალოგი. თითოეული მათგანის შესაქმნელად 10-12 დღეა საჭირო, გამომდინარე იქედან, თუ რა ზომისაა ნივთი და რა სირთულისაა ნახატი. კომპოზიციები იქმნება ყველა ნივთისთვის ინდივიდუალურად, შეკვეთის შემთხვევაში – ვითვალისწინებთ შემკვეთის გემოვნებას.
ხელოვნება მრავალფეროვანია. ერთი კონკრეტული მიმართულებით ხელოვანი ვერ იქნები. ქსოვა, ხატვა, დიზაინი, ქარგვა და ბევრი რამ გვაინტერესებს. თუმცა, ამჟამად, ჩვენი ინტერესის სფერო ვიტრაჟული ხატვაა. ვცდილობთ, ამ ჟანრში ჩვენი სიტყვა ვთქვათ“
