“უმმი” – გახლავთ ბრენდი, რომელიც ჯერ მხოლოდ ორ წელს ითვლის. ამ დროიდან მოყოლებული, მას აქვს მიზანი – მომხმარებელს ჯანსაღი პროდუქტების არჩევანი შესთავაზოს და ამ მიზანს ის წარმატებით ახორციელებს.
კონკრეტულად, რა გზა გაიარა კომპანიამ, რას სთავაზობს ის საზოგადოებას და რა პრინციპით მუშაობს კაფე-რესტორანი – სალომე კალანდაძე, „უმმი“-ს დამფუძნებელი “თბილისი თაიმსს” ესაუბრა.
“დაახლოებით, ერთი წელია, რაც ეს სტარტაპი არსებობს. თუმცა, პანდემიის დროს გაჩნდა ჩანასახი და ბაზარზეც ამავე დროს გამოჩნდა. მიზეზი იყო შემდეგი – მე გავხდი უმი ვეგანი და აღმოჩნდა, რომ არ არსებობდა შესაბამისი საკვების არჩევანი საქართველოში. იდეა გავუზიარე ჩემს მეგობარს და დავიწყეთ ჩვენი ცხოვრების წესის გაზიარება სხვა ადამიანებისთვის.
ერთი წლის წინ ჩვენ მივიღეთ მონაწილეობა ბიზნესპროექტში, სადაც მოვიპოვეთ დაფინანსება და შემოგვიერთდა ქართველი ბიზნესმენი, პავლე მგელაძე. ასე გადავიდა ჩვენი კომპანია განვითარების შემდეგ ეტაპზე. „უმმი“ არის მინიმალისტური სამზარეულოს კონფეცფია, რომელიც ახორციელებს კაფე-რესტორნის მომსახურებას. ასევე, გვაქვს მიწოდების სერვისი, ვადგენთ ყოველდღიურ რაციონებს იმ ადამიანებისთვის, რომლებიც არიან დაინტერესებულები ჯანსაღი ცხოვრების წესით. ჩვენთან ნებისმიერი კერძი მზადდება თერმული დამუშავების გარეშე – ჩვენ არ ვწვავთ, არ ვხარშავთ, არ ვაცხობთ… არ ვიყენებთ ტაფას და ქვაბს და, დედამიწის რესურსების მინიმალური გამოყენებით, ვამზადებთ კერძებს. ერთაერთი გზა, რომ საკვებს შეუნარჩუნდეს სასარგებლო თვისებები და მინერალები, არის ის, რომ თერმულად არ დავამუშავოთ.
ვეგეტარიანელობის მიმართ მეტნაკლებად უკვე გახდა საზოგადოება ინფორმირებული, ვეგანობის მიმართ ჯერ – ვერა. არის ოთხი ტექნოლოგია, რომელსაც ვიყენებთ სამზარეულოში. ესენია: გაღივების მეთოდი, ფერმენტაციის, დეჰიდრაციის და ფრიზინგის, ეს ნიშნავს, რომ თერმული დამუშავების გარეშე პროდუქტებს ვუნარჩუნებთ ფორმას და გვაქვს შესაძლებლობა, დავამზადოთ „უმი ტორტი“, „უმი სენდვიჩი“ და ა.შ.”, – ამბობს სალომე კალანდაძე “თბილისი თაიმსთან” საუბრისას.
