საქართველო მალე შეიძლება გახდეს მაღალშემოსავლიანი ქვეყანა, თუ ეს პროგნოზები გამართლდა და დარწმუნებული ვარ, რომ ასე იქნება, საქართველო 2030 წლამდე შეძლებს გახდეს მაღალშემოსავლიანი ქვეყანა, რაც კეთილდღეობის სულ სხვა დონეს ნიშნავს, – ამის შესახებ ფინანსთა მინისტრის მოადგილემ „ქრონიკის“ პირდაპირ ეთერში ისაუბრა.
„როგორც წესი სავალუტო ფონდის მოკლევადიანი, ერთწლიანი პროგნოზი არის მკვეთრად, ჭარბად წინდახედული, კონსერვატიული. როგორც წესი უფრო მაღალ ზრდას ვაჩვენებთ ჩვენ ბოლო წლების განმავლობაში, ვიდრე ეს არის სავალუტო ფონდის პროგნოზი. 2021 და 2022 წელებში მათ პროგნოზზე 3-ჯერ მეტი ზრდა ვაჩვენეთ. ახლა კიდევ თუ სავალუტო ფონდი ამბობს, რომ წელს 4%-ით გაიზრდება და ლოგიკას თუ მივყვებით და შევხედავთ, არ არის გამორიცხული, რომ 3-ჯერ უფრო მაღალი ზრდაც ვაჩვენოთ და კარგი შედეგები გავიმეოროთ. ჩვენ უკვე ვდგავართ ისეთ გზაზე, რომ საქართველო მალე შეიძლება გახდეს მაღალშემოსავლიანი ქვეყანა. დღეს საშუალოშემოსავლიანი ვართ. თუ ეს პროგნოზები გამართლდა და დარწმუნებული ვარ, რომ ასე იქნება, საქართველო 2030 წლამდე შეძლებს გახდეს მაღალშემოსავლიანი ქვეყანა, რაც კეთილდღეობის სულ სხვა დონეს ნიშნავს“,- განაცხადა დუნდუამ.
საერთაშორისო სავალუტო ფონდის გრძელვადიანი პროგნოზით, საქართველო ოთხი მიმართულებით მსოფლიოში მეორე და მსოფლიოს აღმოსავლეთ ნახევარსფეროში პირველ ადგილზე გავიდა.
