თბილისის აეროპორტის მმართველი კომპანია “ტავ ჯორჯია” კომპანიის ყოფილი თანამშრომლის, გიორგი ფხალაძის განცხადებას ეხმაურება. ფხალაძემ გუშინ დაწერა, რომ არ მოემსახურებოდა რუსეთიდან პირდაპირი რეისით ჩამოფრენილებს. მან თქვა, რომ დაწერა განცხადება სამსახურიდან წასვლის შესახებ და 19 მაისიდან აეროპორტში აღარ იმუშავებდა.
“ტავ ჯორჯია” ამბობს, რომ ფხალაძემ წასვლის შესახებ განცხადება 1-ელ მაისს დაწერა და სამსახურის დატოვება ვერანაირ კავშირში ვერ იქნება რუსული ავიაკომპანიებისთვის საქართველოში ფრენებზე აკრძალვის მოხსნასთან.
“იქიდან გამომდინარე, რომ მისი სტატუსი შეიცავს არაერთ უზუსტობას, იძულებულნი ვართ, განვმარტოთ, რომ გიორგი ფხალაძემ სამსახურიდან წასვლის შესახებ განცხადებით კომპანიის ადამიანური რესურსების მართვის სამსახურს მიმდინარე წლის 1-ელ მაისს მიმართა. შესაბამისად, მის მიერ სამსახურის დატოვება ვერანაირ კავშირში ვერ იქნება რუსული ავიაკომპანიებისთვის საქართველოში ფრენებზე აკრძალვის მოხსნასთან, რის შესახებაც 10 მაისს გახდა ცნობილი.
აღსანიშნავია ისიც, რომ გიორგი ფხალაძეს, რომელიც თბილისის საერთაშორისო აეროპორტის ავტოსადგომის მოლარე-ოპერატორად მუშაობდა, საჰაერო ხომალდების მომსახურებასთან არანაირი შეხება არ ჰქონდა. შესაბამისად, სრულიად უადგილოა მისი მხრიდან საუბარი იმაზე, რომ “რუსეთიდან პირდაპირი რეისით ჩამოფრენილებს არ მოემსახურება”, – წერია განცხადებაში.