ხელწერა, რომელიც ძალიან ბევრისგან გამოარჩევს და იდეა, რომელიც ყოველი ქართველისთვის საინტერესოა – ასე შეგვიძლია, დავახასიათოთ ჩანთები, რომლებსაც ვერა ქაფიაშვილი ქმნის. დიდი ხნის სურვილი, ჰქონოდა საკუთარი ატელიე და საყვარელი საქმიანობა ყოველდღიურობად ექცია, დღეს უკვე რეალურია. ის ქმნის ჩანთებს, რომლებიც ჩვენი ქვეყნის ისტორიასა და სომბოლიკაზეა აგებული. ვერა „თბილისი თაიმსს“ საკუთარ განვლილ გზასა და გეგმებზე ესაუბრა.
ნამუშევრებს რისგან ქმნით?
ნამუშევრებს ვქმნით ნაჭრისგან, სქელი მასალაა, ალკანტარა ჰქვია. გვაქვს ასევე ნაქსოვი ჩანთები და ტყავის შემცვლელისგან დამზადებული წელის ჩანთებიც.
თემატურად ძალიან საინტერესო ხაზი აქვს თქვენს ნივთებს – იდეის შესახებ გვიამბეთ.
წლების განმავლობაში ვმუშაობდი „ატელიე სამოსში“. იქ გავიზარდე, როგორც მკერავი და მასწავლეს ყველაფერი. სახლში დაბრუნებულს რატომღაც ყოველთვის მქონდა სურვილი, რომ ჩემი შემექმნა და აუცილებლად მინდოდა, ეს ყოფილიყო ქართული, რითაც სხვა ქვეყანას გავაცნობდი ჩემს ნამუშევრებსაც და დავაინტერესებდი ქვეყნითაც.
კოვიდის დროს, ისევე – როგორც ყველას, მეც ბევრი დრო დამრჩა საფიქრალადაც და ახლის დამზადებისთვისაც. დავიწყე ჩანთების კერვა. პირველმა ცდამ გაამართლა და ყველა გაყიდული თანხა ისევ მასალას მოვახმარე. ინტერნეტის დახმარებით და ჩემი დიდი შრომის შედეგად, მალე გახმაურდა ჩემი ჩანთების შესახებ და ზუსტად 2 წელში გავხსენი საკუთარი ატელიე, სადაც ადგილზე ვკერავ და ვყიდი ჩემს, გულით შექმნილ ნაწარმს.
მხატვარი, რომელიც ჩემი ბავშვობის მეგობარია, დიდი შრომით და გვერდში დგომით მიხატავს ჩანთებს, რა თქმა უნდა, ქართული თემატიკით და ვცდილობთ, პატრიოტული ხაზით ვიმუშაოთ. გამოგვდის და გვიფასდება.
როგორი გამოხმაურება მოჰყვა თქვენს ამ ნაბიჯს – ბევრი მომხმარებელი გყავთ?
გამოხმაურება იმაზე დიდი მოჰყვა, ვიდრე ველოდი. იმას თუ გავითვალისწინებთ, რომ ასე თუ ისე დამწყები მერქვა ამ სფეროში, დღეს უკვე საკმაოდ ბევრი მომხმარებელი გვყავს.
საინტერესოა, როგორია უცხოელების აქტივობა?
უცხოელების არა, უფრო ემიგრანტების, რისთვისაც უღრმესი მადლობა მათ.
თამამად შემიძლია, ვთქვა, რომ ჩემი ატელიე ემიგრანტებით სულდგმულობს. მიკვეთენ, ყიდულობენ, ჩუქნიან უცხოელ მეგობრებსაც.
თუ გეგმავთ, სხვა პროდუქციაც აწარმოოთ?
ამ ეტაპზე, მხოლოდ ჩანთებით ვარ დაინტერესებული. ღმერთმა ქნას, ისე წავიდეს საქმე, რომ შევძლო სხვა რამეც და შევძლო იმდენი, რომ დავასაქმო თუნდაც 2 ადამიანი და მერე შეიძლება, ვიფიქროთ სხვა პროდუქციის წარმოებაზეც. ოღონდ აუცილებლად იქნება ქართული თემატიკით და ისეთი რამ, რითაც ვასახელებ ჩვენს ქვეყანას.
