რუსებმა როსტოვში შესასვლელი გადაკეტეს. BBC-ის ცნობით, მთლიანობაში, გადაკეტილია ექვსი მონაკვეთი, მათ შორის პლატოვის აეროპორტის მიდამო ქალაქ შახტიში. ასევე დაკეტილია ზერნოგრადის მახლობლად სტავროპოლ-როსტოვის მაგისტრალის მონაკვეთები.
ეს გადაწყვეტილება, ოკუპანტებმა, სავარაუდოდ მას შემდეგ მიიღეს, რაც ცოტა ხნის წინ პრიგოჟინმა თქვა, რომ თავის არმიასთან ერთად როსტოვში შედიოდა: “ახლა როსტოვში შევდივართ… თუ ვინმე გადაგვიდგება გზაზე, გავანადგურებთ”.
ცნობისთვის, სიტუაცია რუსეთში მას შემდეგ დაიძაბა, რაც დაჯგუფება “ვაგნერის” ხელმძღვანელმა ევგენი პრიგოჟინმა რუსული არმია “ვაგნერის” ბანაკებზე სარაკეტო თავდასხმაში დაადანაშაულა. ის ამბობდა, რომ დაქირავებულთა დიდი რაოდენობა დაიღუპა.
პრიგოჟინის ბრალდება რუსეთის თავდაცვის სამინისტრომ უარყო და თქვა, რომ “ვაგნერის” ბანაკებზე სარაკეტო თავდასხმის მტკიცებულებები “რეალობას არ შეესაბამებოდა”.
