ჩა cha – ამ სახელწოდების ქვეშ ერთიანდება არაერთი სახეობის, ქართული, ნატურალური და ბევრისგან გამორჩეული ჩაი, რომლის არსებობის ისტორიაც სათავეს იდეის ავტორის ბავშვობიდან იღებს. მომხმარებლისთვის ჩაის შეთავაზება მარიამ არაბულისთვის საკუთარ საქმედ სულ რაღაც ერთი წლის წინ იქცა. განსაკუთრებული შეფუთვითა და საინტერესო არჩევანით, მისი პროდუქტი დღეს მოთხოვნადია და მარიამიც ცდილობს, საზოგადოებას სიახლეები ხშირად შესთავაზოს. ის „თბილისი თაიმსს“ ესაუბრა.
მცენარეული ჩაის შეგროვება და დაგემოვნება ბავშვობიდან ოჯახის ტრადიცია იყო, ოფიციალური იდეა გაჩნდა ერთი წლის წინ, როცა ბავშვი გავაჩინე და წამოვედი სამსახურიდან. სულ მინდოდა, ჩემი საქმე მქონოდა, რომელიც სასარგებლოც და საყვარელიც იქნებოდა ერთდროულად და უსამსახუროდ დარჩენამ ძალიან დიდი ბიძგი მომცა ამ ნაბიჯის გადასადგმელად. ჩაის ჩვენეული ვერსიები გადაწყდა ბაზრის კვლევის შემდეგ, გვინდოდა – ყველაზე განსხვავებული, ორიგინალური შეფუთვა და არჩევანი გვქონოდა, რამაც, ჩემი აზრით, გაამართლა.
კონკრეტულად, ჩაის რა სახეობებს სთავაზობთ მომხმარებელს?
ჩვენ მომხმარებელს ვთავაზობთ ქართულ, ნატურალურ, ბალახეულ ჩაის. ამ ეტაპზე, გვაქვს ჩაის 12 სახეობა. ესენია: შავი, მწვანე, დეკა, ცაცხვი, თავშავა, კრაზანა, ბეგქონდარა, ჟოლოს ფოთლები, გვირილა, კარკადე და მიქსები სიყვარულის ჩაი და ზამთრის ჩაი.
რით არის თქვენი ჩაი გამორჩეული ?
პირველ ყოვლისა, რაც ყველასგან გამოგვარჩევს, არის ის, რომ გვაქვს ხელნაკეთი, ერთჯერადი ჩაის პაკეტები. ასევე, მრავალფეროვანი არჩევანი, ახალი გემოები. გარდა ქართული ბალახეულისა, გვაქვს ორი მიქსი. ჩვენი აღმოჩენილო გემოები, რომელიც ყველაზე მეტი პოპულარობით სარგებლობს მომხმარებლებში.
მთელი საქართველოს მასშტაბითაა ის ხელმისაწვდომი?
გვაქვს საკურიერო მომსახურეობა და რეგიონებში ვაგზავნით ფოსტით. ამ ეტაპზე, თბილისს გარეთ ვართ გუდაურსა და შეკვეთილში. იმედია, სხვა რეგიონებსაც მალე დავამატებთ.
რამდენად ხშირად სთავაზობთ საზოგადოებას სიახლეებს?
გამომდინარე იქიდან, რომ ბაზარზე გამოჩენის დღიდან ძალიან მალე გავიჩინეთ ერთგული მომხმარებელი და კარგ უკუკავშირს ვიღებთ, ვგრძნობთ დიდ პასუხისმგებლობას და ვცდილობთ, ბევრი სიახლე შევთავაზოთ მომხმარებლებს.
თუ გეგმავთ, რომ მათ ახალი პროდუქტიც შესთავაზოთ?
ახლა ვმუშაობთ ახალ მიქსზე და ვფიქრობთ, ზაფხულის მიწურულს ახალი, საინტერესო გემოები დაგვემატება.
