ადგილობრივი, ამა თუ იმ ქვეყნისთვის დამახასიათებელი ტკბილეული ყოველთვის სასურველია როგორც კონკრეტული, ასევე – სხვა ქვეყნების მოსახლეობისთვის. იმისთვის, რომ შენარჩუნდეს ინტერესი და გაიზარდოს მოთხოვნა, ნაწარმი უნდა იყოს ჯანსაღი, ხარისხიანი. სწორედ ეს უკანასკნელი განსაზღვრავს იმ წარმატებას, რომელსაც „ბადაგფრუტმა“ მიაღწია. ის ჯერ მხოლოდ ორი წელია, არსებობს. თუმცა, ასორტიმენტისა და ნამდვილი გემოს წყალობით, მისი შეძენის სურვილი ბევრს აქვს, არამხოლოდ საქართველოში. „თბილისი თაიმსს“ მაიკო ნარიაშვილი ესაუბრა.
რამდენი წელია, რაც „ბადაგფრუტი“ არსებობს?
ორი წელია, რაც „ბადაგფრუტი“ არსებობს. მანამდე, ერთი წელი საკუთარი სახელით დავიწყე, მომხმარებლებისათვის შემეთავაზებინა საკუთარი, ხარისხიანი და ქართულ ინგრედიენტებზე დამზადებული პროდუქცია.
საინტერესოა, რა ისტორია აქვს თქვენს საქმიანობას?
ჩემი ჩურჩხელების წარმოების დაწყება შემთხვევითობა იყო. მეგობარს გაზაფხულზე დასჭირდა საზღვარგარეთ ჩურჩხელების წაღება და მთხოვა, სოფელში სანდოდ რომ შეგვეძინა, ვერ ვიშოვეთო. მქონდა შენახაული ბადაგი და კაკალი, დროც იყო საკმარისი, რომ დამემზადებინა და ასეც მოვიქეცით. როდესაც იქ დააგემოვნეს, ძალიან დიდი მოწონება დაიმსახურა ჩემ მიერ ნაუცბათევად მომზადებულმა ჩურჩხელებმა და სწორედ ეს გახდა ინსპირაციის საფუძველი – დამეწყო ჩემი პატარა საქმე. გამოვიყენე ბებიების მიერ ნასწავლი, ბადაგის მოდუღების ძველებური მეთოდი, ჩემზე მოვირგე, მცირე კორექტირება შევიტანე და გაამართლა.
რით მზადდება თქვენი ნაწარმი?
ჩვენი პროდუქტი ჩვენ მიერ მოყვანილი პროდუქტით მზადდება – ჩვენ მიერ მოდუღებულ ბადაგს ვიყენებთ, ჩვენ მიერ მოკრეფილ თხილეულს და ქართულ ფქვილს.
რაც შეეხება თათარის ბურთების თათარელებს – მისი საავტორო უფლებები მე მეკუთვნის, თათარის და ყველის დამეგობრების იდეაც ჩემია. ბევრი თათარა მრჩებოდა და გარშემო აღარავის უნდოდა მირთმევა, ამიტომ, გაჩნდა თათარელების იდეა.
ხშირად გაქვთ სიახლეები?
ახლახან მოვიფიქრე – თათარის ტყლაპში გადამეხვია ხაჭოს გულსართი, ჩემებურად შეზავებული და გაამართლა, საოცრად გემრიელი ტკბილეული მივიღეთ. სპეციალობით ბიოლოგი ვარ, კვების პროდუქტების განხრით ექსპერტი და ჩემი დაგროვებული ცოდნა ამ მიმართულებით, წარმოებაში ძალიან მეხმარება – ზუსტად ვიცი მათი შენახვის პირობები და დრო.
ჩვენი პროდუქცია მომხმარებელს შეუძლია, დააგემოვნოს სხვადასხვა ფესტივალზე, რომელიც საქართველოში იმართება. ასევე, გვაქვს გასვლები საზღვარგარეთ, სადაც ვატარებთ მასტერკლასებს თათარის მომზადებაზე, ჩურჩხელის ამოვლებაზე, ვაცნობთ მისი წარმოშობის ისტორიას.
პანდემია რომ დაიწყო, მე იმ წელს მივიღე მონაწილეობა გლობალური ტრენერების აკადემიის კონკურსში, სადაც გატანილი მქონდა კახური ჩურჩხელის დამზადების პროცესის, მისი ისტორიის, შემადგენლობის, სასარგებლო თვისებების შესახებ ინფორმაცია და ამ კონკურსზე, სადაც 140 ქვეყანა იყო წარმოდგენილი, ავიღე ვერცხლის მედალი.
