ბათუმში 13 წლის შვილის გაუპატიურების ბრალდებით დაკავებული კაცის დედამ ტელეკომპანია “ფორმულას” ჟურნალისტზე ფიზიკურად იძალადა. მომხდარის ვიდეოკადრებს “ფორმულა” ავრცელებს.
შემთხვევა 13 ივლისს მოხდა.
პროკურატურამ მომხდარზე ერთ პირს ბრალი ჟურნალისტისთვის პროფესიულ საქმიანობაში უკანონოდ ხელის შეშლისა და ძალადობისთვის წარუდგინა.
“სპეციალური საგამოძიებო სამსახურის მიერ ჩატარებული გამოძიების შედეგად დადგინდა, რომ 13 ივლისს, ბათუმში, ბრალდებულმა ჟურნალისტური საქმიანობის შეწყვეტის მიზნით ტელეკომპანია “ფორმულას” ჟურნალისტის მიმართ ძალადობა განახორციელა.
მას ბრალდება საქართველოს სისხლის სამართლის კოდექსის 126-ე მუხლის 1-ლი ნაწილით (ძალადობა) და 154-ე მუხლის 1-ლი ნაწილით (ჟურნალისტისთვის პროფესიულ საქმიანობაში უკანონოდ ხელის შეშლა) წარედგინა,” – ნათქვამია პროკურატურის განცხადებაში.
ფორმულას ინფორმაციით, შემთხვევა მაშინ მოხდა, როცა ჟურნალისტი სიუჟეტის მოსამზადებლად ბრალდებულის ოჯახში მივიდა. მას ქალმა რამდენჯერმე დაარტყა ხელი თავსა და სახეში, მიაჯახა კედელს და ხელს უშლიდა პროფესიული საქმიანობაში.
ტელეკომპანიის თქმით, ჯერჯერობით ბრალდებული დაკავებული არ არის. როგორც პროკურატურა ამბობს, აღკვეთი ღონისძიების შეფარდების შუამდგომლობით, სასამართლოს კანონით დადგენილ ვადაში მიმართავს.
