ჰავაის კუნძულ მაუიზე ტყის ხანძრის შედეგად დაღუპულთა რაოდენობა მკვეთრად გაიზარდა და 89-ს მიაღწია, ხოლო უგზო-უკვლოდ დაკარგულად ითვლება ასობით ადამიანი. ამის შესახებ ინფორმაციას BBC ავრცელებს. როგორც გამოცემა ადგილობრივ გუბერნატორ ჯოშ გრინზე დაყრდნობით წერს, დაზარალებულთა იდენტიფიცირებისთვის ექსპერტიზა გრძელდება.
„ეს ხანძარი, რა თქმა უნდა, ყველაზე საშინელი ბუნებრივი კატასტროფაა, რომელიც ჰავაიზე ოდესმე მომხდარა. ჩვენ მხოლოდ ის შეგვიძლია, დავიცადოთ და დავეხმაროთ ცოცხლად დარჩენილებს. ახლა იმაზე ვართ კონცენტრირებული, რომ ეს ხალხი საცხოვრებლებითა და მედიკამენტებით უზრუნველვყოთ, შემდეგ კი, კუნძულის აღდგენაზე გადავიდეთ“, – განაცხადა ჯოშ გრინმა.
როგორც BBC წერს, იმის მიუხედავად, რომ ამ დროისთვის ხანძრის უდიდესი ნაწილი კონტროლს ექვემდებარება, მისი სრული ლიკვიდაციის სამუშაოები ამ დრომდე გრძელდება კუნძულის რამდენიმე ნაწილში, მათ შორის, მის ტურისტულ და ბიზნესცენტრ ლაჰაინაში.
ცნობისთვის, კუნძულზე ხანძრის მასშტაბურ გავრცელებას ხელი შეუწყო ქარიშხალმა დორამ. ხანძრის შედეგად ასევე დაზარალდა ჰავაის „დიდი კუნძული“.