“ჩვენი მუსიკის მთავარი მესიჯი ძალიან მარტივია. ამ სცენაზე ვდგავარ, შემიძლია იმის კეთება, რაც მიყვარს და აქ ვარ, რადგან ადამიანები მეხმარებოდნენ. თუ თავს მარტო გრძნობ, თუ დეპრესიაში ხარ, თუ გგონია, რომ ცხოვრება არ გიღირს, გთხოვ, ეგ ფიქრები შენთვის არ დაიტოვო და დაელაპარაკე, მეგობრებს, ოჯახს და თუ შესაძლებლობა გაქვს, თერაპევტს.
შენს ცხოვრებას ყოველთვის აქვს აზრი. შენს ცხოვრებას ყოველთვის აქვს აზრი. გთხოვ, ჩვენთან დარჩი. ყველაფერი უკეთესობისკენ შეიცვლება. გპირდები, რომ მარტო აღარ ხარ. შეიძლება დეპრესია დაბრუნდეს. ის ჯერ კიდევ ჩემი ცხოვრების ნაწილია. დეპრესიას ყოველთვის ვებრძვი. ხანდახან უმიზეზოდ უარესდება და ბრუნდება, ყოველთვის ახსნა არ აქვს. ის უბრალოდ არსებობს. მაგრამ დარჩი ჩემთან ერთად ცოცხალი, რადგან ერთმანეთი გვჭირდება. სულ ესაა. ასეთი მარტივია. დარჩი ჩვენთან” – ეს სიტყვები 31 აგვისტოს მიხეილ მესხის სახელობის სტადიონზე ცნობილი ჯგუფის, Imagine Dragons-ის სოლისტმა, დენ რეინოლდსმა წარმოთქვა. ჯგუფს მთელი მსოფლიოს მასშტაბით მილიონობით გულშემატკივარი ჰყავს და გამონაკლისი, როგორც აღმოჩნდა, არც ქართველი მსმენელი აღმოჩნდა – გადაჭედილი ტრიბუნებიდან მუსიკოსებთან ერთად ათასობით ადამიანი მღეროდა და ეს საღამო მათთვის დაუვიწყარ მოგნებად იქცა.
ჯგუფის სოლისტმა, დენ რეიონლდსმა თავის სიტყვაში აღნიშნა, რომ დეპრესია და რთული მომენტები, მიუხედავად ბრწყინვალე კარიერისა, დღემდე მისი ცხოვრების ნაწილია. დენმა ისიც თქვა, რომ ამ რთული პერიოდების გადატანაში მას ადამიანები ეხმარებიან და, ალბათ, პირველი, ვისი იმედიც მას აქვს, მისი ოჯახია.
დენ რეინოლდს სიყვარულის ლამაზი, თუმცა სევდიანი ისტორია აქვს. მან ყოფილ მეუღლესთან, ასევე მუსიკოს აჯა ვოლკმანთან ურთიერთობისას არაერთი დაბრკოლება გაიარა, წყვილი რამდენჯერმე დაშორდა ერთმანეთს, თუმცა მალევე ხვდებოდნენ, რომ ცალ-ცალკე ცხოვრება უჭირდათ.
დენი და აჯა ერთმანეთს ლას ვეგასში, კონცერტზე შეხვდნენ: “მე ვფიქრობდი, რომ ეს ბიჭი ძალიან საყვარელია, მაგრამ იმ დროს ნამდვილად არ მსურდა სერიოზული ურთიერთობა” – ამბობდა ვოლკმანი Las Vegas Weekly-სთან ინტერვიუში. მიუხედავად ამისა, მათ შეხვედრიდან ერთი წლის თავზე,2011 წელს იქორწინეს, რადგან ორივე დარწმუნებული იყო, რომ ერთმანეთი უყვარდათ და ერთად ყოფნა სურდათ.
წყვილს 2012 წელს პირველი შვილი, გოგონა, სახელად აროუ შეეძინა. 5 წლის შემდეგ კი ტყუპების, ჯიას და კოკოს მშობლები გახდნენ.
2018 წლის აპრილში წყვილმა განაცხადა, რომ ისინი ერთმანეთს შორდებოდნენ. “შვიდი ლამაზი წლის შემდეგ, ჩემი და აჯას ქორწინება დასრულდა”, – დაწერა რეინოლდსმა ტვიტერზე. „ჩვენი შვილები კვლავაც არიან ყველაზე მნიშვნელოვანი ჩვენს ცხოვრებაში და ჩვენ გავაგრძელებთ მათ აღზრდას მთელი ჩვენი სიყვარულით. გთხოვთ, გთხოვთ, პატივი სცეთ ჩვენს კონფიდენციალურობას ამ რთულ დროს, რადგან ჩვენ კვლავ ვუდგებით ამ საქმეს, როგორც ოჯახი” – წერდა მუსიკოსი, თუმცა მათი დაშორება დიდხანს არ გაგრძელებულა. 2018 წლის ნოემბერში გავრცელდა ინფორმაცია, რომ ისინი ცდილობდნენ ურთიერთობის აღდგენას.
2019 წლისთვის წყვილი ისევ ერთად იყო. „ჩვენ გადავწყვიტეთ, რომ უბრალოდ გავაგრძელოთ თანაცხოვრება… ეს შესვენება საჭირო იყო და ჩვენ ვაგრძელებთ ცხოვრებას, როგორც ოჯახი. პრობლემები ყველას აქვს, ქორწინება არ არის სრულყოფილი, ურთიერთობები არ არის სრულყოფილი, არც ჩემი სხეულია სრულყოფილი, მაქვს ჯანმრთელობის პრობლემები, დეპრესია და შფოთვაც მაქვს… ჩვენ, ყველა, ადამიანები ვართ და ეს ჩვეულებრივი მოვლენაა” -ამბობდა დენი.
ამ შერიგებას წინ ემოციური ამბავი უძღოდა. მას შემდეგ, რაც წყვილი დაშორდა, 7 თვე ისე გავიდა, რომ მათ ერთმანეთთან არ უსაუბრიათ. მოულოდნელად კი დენმა მეუღლისგან მიიღო წერილი, სადაც აჯა წერდა, რომ ის უყვარდა. დენი ამბობდა, რომ ამ წერილმა მისი ცხოვრება შეცვალა.
“მიყვარხარ და არ არის საჭირო, რომ ჩემი საკუთრება იყო, რათა მიყვარდე. ჩვენ გვჭირდება მეორე შანსი” – ეწერა წერილში.
როგორც “Imagine Dragons” -ის სოლისტი ამბობდა, მან ამ წერილის მიღების შემდეგ ჯგუფის ერთ-ერთი ჰიტი, Follow you წერა. სიმღერის გამოქვეყნებისას კი მას ასეთი ტექსტი დაურთო: “ოდესმე მიგიღიათ წერილი, რომელმაც თქვენი ცხოვრება შეცვალა?”
მორიგი შერიგების შემდეგ, 2019 წელს დენ რეინოლდსსა და აჯა ვოლკმანს მეოთხე შვილი, ვალენტინი შეეძინათ. ამავე წლის დეკემბერში, დენმა აჯას მეორედ სთხოვა ცოლობა პასუხად თანხმობა მიიღო, თუმცა ამ ურთიერთობის დასასრული ნამდვილად არ ჰგავს ზღაპარს – ისინი 2022 წელს ისევ დაშორდნენ: „სევდიანად ვამბობ, რომ მრავალი ლამაზი წლის შემდეგ, მე და აჯა დავშორდით” – წერდა დენი ტვიტერზე. აჯამ ამჯერად ოფიციალურად შეიტანა განცხადება განქორწინების თაობაზე. როგორც ტაბლოიდები წერდნენ, რეინოლდსმა იმავე წელს დაიწყო ახალი ურთიერთობა მინკა კელისთან, რომელთან ერთადაც ის 2022 წლის ნოემბერში გამოჩნდა.
36 წლის მუსიკოსი შესანიშნავი მამაა, ის ახლა კარიერის ზენიტშია და წარმატებით აგრძელებს მსოფლიოს გარშემო ტურნეს. როგორც თავად აღნიშნა, მოიხიბლა ქართველი ხალხის სტუმართმოყვარეობითა და საკვებით, თავად კი მიხეილ მესხის სახელობის სტადიონზე შეკრებილ ათასობით მსმენელს დაუვიწყარი საღამო უსახსოვრა.
