საქართველოს პრეზიდენტი გიორგი მარგველაშვილი ვარაუდობს, რომ “უმაღლესი განათლების შესახებ” კანონში არავითარი ტერმინოლოგიური ცვლილება არ არის.
როგორც გიორგი მარგველაშვილმა ჟურნალისტებს თემის კომენტირებისას განუცხადა, იგი გადაამოწმებს ადრე როგორ იყო მოხსენიებული კანონებში ის გამყოფი ტერიტორია, რომელიც ოკუპირებულ ტერიტორიებსა და დანარჩენ საქართველოს შორის არის გავლებული. პრეზიდენტის განცხადებით, საქართველოს პოლიტიკური ხელმძღვანელობა მიიჩნევს, რომ ეს ტერიტორიები არის ოკუპირებული.
“თანამდევი ტერმინების გამოყენების თაობაზე, რა არის სწორი რომ დავარქვათ ამ ხაზს, რომელიც ჩვენი შეხედულებით, სრულიად უკანონოდ არის იქ აღმართული, ამაზე მე ამ მომენტში პოზიცია არ გამაჩნია. რადგან ჩვენ უნდა ვნახოთ, მანამდე როგორ იყო კანონში და ახლა როგორ არის კანონში. მე ვვარაუდობ, რომ არაფერი შეცვლილა და როგორც იყო მანამდე, იგივე ტერმინი იხმარება. მაგრამ ტერმინები სხვა საკითხია. ჩვენ გვინახავს ბევრი ასეთი ყურით მოთრეული თემა, როდესაც ჩვენი პოლიტიკური ოპონენტები, რომლებიც რატომღაც ცდილობენ უფრო დიდ პატრიოტებად გაასაღონ თავი, ვიდრე ჩვენ ვართ და გვეჯიბრებიან პატრიოტიზმში, ასეთი ყურით მოთრეული თემებით. მინდა ხაზი გავუსვა, რომ საქართველოს პოლიტიკური ხელმძღვანელობა არანაირად უკან არც ერთი ნაბიჯის გადადგმას არ აპირებს. ეს პოზიცია გვაერთიანებს არა მარტო იმ ხალხს, ვინც ვართ ხელისუფლებაში, ეს პოზიცია აერთიანებს მთელ საქართველოს მოსახლეობას”, – განაცხადა გიორგი მარგველაშვილმა.
მისივე თქმით, ესმის, რომ არსებობს მცდელობა მოხდეს დიფერენციაცია და ხელისუფლების წარმომადგენლები გამოყვანილი იყოს ნაკლებ პატრიოტებად და “ნაციონალური მოძრაობის” რამდენიმე წარმომადგენელი უფრო გულანთებულ ადამიანად.
“მე მესმის, რომ ამის მცდელობა არსებობს. მე მესმის, რომ ეს თემები მუდმივად იქნება წამოწეული, მაგრამ ვვარაუდობ, რომ კანონში არავითარი ტერმინოლოგიური ცვლილება არ არის”, – განაცხადა გიორგი მარგველაშვილმა.
ოკუპირებულ ტერიტორიებთან გამყოფი ხაზის მიმდებარე სოფლებში დაზარალებული სტუდენტების სწავლას სახელმწიფო დააფინანსებს. მათი სასწავლო გრანტით დაფინანსება სტუდენტებისთვის განსაზღრული სოციალური პროგრამის ფარგლებში მოხდება.
აღნიშნულთან დაკავშირებით მთავრობამ “უმაღლესი განათლების შესახებ” კანონში დაგეგმილი ცვლილებების პროექტი პარლამენტს უკვე წარუდგინა.
პარლამენტის სესიაზე საპარლამენტო ოპოზიციამ ის ფაქტი გააპროტესტა, რომ პროექტში ტერმინი “გამყოფი ხაზია” გამოყენებული. მათ მმართველ გუნდს აღნიშნული ტერმინის “საოკუპაციო ხაზით” ჩანაცვლება მოსთხოვეს.
26.12.13
