„ატარე თილისმა“ – ეს გახლავთ იმ სკივრის სახელწოდება, რომელშიც თავს არაერთი მბზინავი, თვალისმომჭრელი ნამუშევარი იყრის. ამ ჯადოსნური ნივთების ავტორი მარიამ ბერიანიძეა.
აქსესუარები, რომლებსაც ის ქმნის, ხასიათდება ხარისხით, გემოვნებით და ნამდვილად უსვამს ხაზს მფლობელის თავდაჯერებულობას. საყვარელ საქმიანობაზე მარიამი „თბილისი თაიმსს“ ესაუბრა.
ხელოვანი აღნიშნავს, თუ რა სახის ნამუშევრებს სთავაზობს მომხმარებელს.
„ვამზადებ ხელნაკეთ აქსესუარებს, როგორებიცაა გულსაბნევი, თავსამკაული, ბეჭედი, სამაჯური, ბრელოკი და ა.შ. მასალად ვიყენებ მძივებს, ბისერებს, კრისტალებს, ნატურალურ ქვებს და მსგავსი ტიპის სხვადასხვა მასალას, რომლებსაც ძირითადად ვიწერ“.
მარიამის თქმით, ამ მხრივ ის თვითნასწავლია და მისი ინტერესი სათავეს ბავშვობიდან იღებს. მისთვის საინტერესოა ქარგვა, ქსოვა და კერვა. თუმცა, საბოლოოდ, საკუთარი თავი მძივებით ქარგვასა და საინტერესო აქსესუარების შექმნაში იპოვა.
ჩემი აქსესუარები გამოირჩევა შესრულებით, ხარისხით, დახვეწილი დეტალებით, ორიგინალური და ექსკლუზიური დიზაინით. იქიდან გამომდინარე, რომ ვმუშაობ შეკვეთებზე და ძირითადად ვამზადებ მომხმარებლის სურვილისამებრ აქსესუარებს, მაქსიმალურად ვცდილობ, გამოვნახო დრო და ჩემს მომხმარებელს შევთავაზო ახალი და საინტერესო აქსესუარები, – ამბობს მარიამი „თბილისი თაიმსთან საუბრისას.
