ქართული საზოგადოებისთვის, „ტენეს“ ჩართულობით – მორიგი სიახლე დაინერგა, რაც აღნიშნული კომპანიისა და Georgian Bus-ის თანამშრომლობას გულისხმობს. როგორც ცნობილია, „ტენეს“ საქმიანობა მეორადი პლასტმასით USB კაბელების დამზადებაა, მიზანს კი გარემოზე უარყოფითი გავლენის შემცირება წარმოადგენს. რაც შეეხება სიახლეს – Georgian Bus-ის სამგზავრო ავტობუსებში განთავსდა „ტენეს“ სპეციალური ურნები, სადაც თითოეულ მგზავრს შეეძლება, მოათავსოს მის მიერ მგზავრობისას გამოყენებული პლასტმასის ნებისმიერი ნარჩენი, რომელსაც შემდგომ „ტენე“ გადაამუშავეს მეორადი გამოყენების მიზნით. „თბილისი თაიმსს“ „ტენეს“ გენერალური მენეჯერი, ირაკლი ბურჭულაძე ესაუბრა.
„ავტობუსებში დამონტაჟდა სპეციალური ურნები, რომლებშიც ავტობუსის მგზავრებს აქვთ შესაძლებლობა, მოათავსონ პლასტმასი. პლუს ამას, ავტობუსებს გადავეცით ჩვენი USB კაბელები, რადგან თუ ადამიანს დასჭირდა გზაში მობილური ტელეფონის დატენვა, ეს იქნება შესაძლებელი. გარდა ამისა, მონიტორებზე გავა ცნობიერების ასამაღლებელი ვიდეორგოლები, რათა საზოგადოებამ ისწავლოს ნაგვის სწორად სეპარირება. გარკვეული პერიოდულობით, ჩვენ ამ დაგროვებულ პლასტმასს წამოვიღებთ, გადავამუშავებთ და დავამზადებთ USB კაბელებს. Georgian Bus-ის გარდა, ამ მხრივ ჩვენ უკვე 150-მდე კომპანიასთან ვთანამშრომლობთ. ყოველთვიურად უკვე საკმაო რაოდენობის პლასტმასს ვაგროვებთ“.
ირაკლიმ Tene-ტენე-ს მთავარ იდეასა და მისი ისტორიის შესახებაც ისაუბრა. როგორც მან აღნიშნა, კომპანიის მიზანს – გარემოს მოარიდოს ნარჩენები პლასტმასის სახით, წინა წელთან შედარებით, გაცილებით უკეთესი შედეგი აქვს.
„ვამზადებთ USB კაბელებს მეორადი პლასტმასით. ისტორია დაიწყო ასე – ჩვენ საქმისთვის მხოლოდ ბოთლის თავსახურები გვჭირდებოდა. გარემოზე პლასტმასის ზიანის შესახებ ცნობიერების ამაღლებისთვის, ხალხს ვეუბნებოდით, რომ მოეტანათ 50 ბოთლის თავსახური და მათ ვაჩუქებდით ჩვენ მიერ დამზადებულ USB კაბელს. მაგრამ მივხვდით, რომ ეს არ იყო სწორი – მათ მოჰქონდათ თავსახურები, მაგრამ ყრიდნენ ბოთლებს. ამიტომ, დავიწყეთ ბოთლების შეგროვებაც, რასაც ძალიან დიდი გამოხმაურება მოჰყვა. დავიწყეთ კამპანიები, აქციები, ლექციების ჩატარება… გარდა პლასტამისა, ჩვენ უკვე დავიწყეთ მყარი ნარჩენების ჩაბარება, როგორიცაა შუშა, თუნუქი, მაკულატურა… ამ შეგროვებულ მასალას გადავცემთ კომპანიებს, რომლებიც მათ შემდგომ უკვე ამუშავებენ. ჩვენთვის მთავარია, რომ ისინი მოვაცილოთ ნაგავსაყრელს. წინა წელს რომ შევადაროთ, მომხმარებელში ეს კულტურა უკვე გაჯდა – ადრე თუ მათ საჩუქარი სჭირდებოდათ პლასტამის შესაგროვებლად, ახლა უკვე ჩვევაში გადაუვიდათ“.
