ჩვეულებრივ, სამუშაოს ძებნის პროცესი დაბრკოლებებსა და დროის ფლანგვასთან არის დაკავშირებული. დამღლელი პროცედურების ფონზე, არცთუ ისე იშვიათად, დამსაქმებელი და დასაქმების მსურველი, საბოლოოდ, მაინც ვერც ახერხებენ შეთანხმებას.
Awork – გახლავთ დასაქმების პირველი ქართული აპლიკაცია, რომელიც კომპანიებს კადრების მოძიებაში ეხმარება. არცთუ ისე დიდი ხანია, რაც ის ხელმისაწვდომია, თუმცა, უკვე დიდია დასაქმებულთა რაოდენობა. დეტალურად, „თბილისი თაიმსს“ მარკეტინგის დეპარტამენტის უფროსი, ნინი ზექალაშვილი ესაუბრა.
რამდენი ხანია, რაც არსებობს აპლიკაცია – Awork?
2022 წლის პირველი ივლისიდან ჩაეშვა ვებგვერდი, ხოლო სექტემბრიდან – მობილური აპლიკაცია, 2023 წლის თებერვალში კი – მობილური აპლიკაცია ბიზნესებისთვის.
მანამდე, Awork-ის მუშაობა მიმდინარეობდა წელიწად-ნახევრის განმავლობაში.
რა მიზნით შეიქმნა ის?
მიზანი გახლდათ, რომ სამუშაოს შერჩევის პროცესი უკეთესი ყოფილიყო, მახასიათებლები, სამუშაო კრიტერიუმები – სამუშაო პოზიციების შესაბამისი, მინიმალური ანაზღაურება – მითითებული, ასევე, ცხოვრება რომ გამარტივებულიყო HR-ებისთვის. ყოველგვარი CV-ის ელ. ფოსტაზე გადაგზავნის გარეშე არის შესაძლებელი, რომ დასაქმების მსურველმა კომპანიას საკუთარი რეზიუმე გაუგზავნოს.
საკუთარი პროფილით, რომელიმე ჯგუფთან/პლატფორმასთან თუ თანამშრომლობთ?
გასული წლის ნოემბერში Awork-ი და ფრილანსერების ყველაზე ჯგუფი – Freelancer-ი გაერთიანდნენ. ჯგუფში, ამ ეტაპზე, არის 43 600 წევრი და ოთხი წელია, რაც ის არსებობს. ის ემსახურება დასაქმების ხელშეწყობას ქართულ ბაზარზე, მათ შორის, ჰიბრიდული და დისტანციური სამსახურების პოპულარიზაციას, განათლებას და ა.შ.
საქმიანობისას რა ძირითად სირთულეებს აწყდებით?
ციფრული მიმართულებით არსებული ის უპირატესობები, რაც პლატფორმას აქვს და დამოუკიდებლად ნებისმიერ ხელმძღვანელს აძლევს საშუალებას, ყოველგვარი ზედმეტი ჩარევის გარეშე, თვითონვე მართოს სამუშაოს შერჩევის პროცესი, ჯერჯერობით, არ არის ათვისებული. შესაძლებელია, სამუშაოს მაძიებელს დაეზაროს ინფორმაციის შევსება ან რეზიუმე ჰქონდეს არასწორ ფორმატში გაკეთებული – სწორედ ამიტომ, ჩვენ აქტიურად ვმუშაობთ სემინარების, ვებინარების ნაწილზე, ბიზნესებთან შეხვედრების ჩატარებაზე და ა.შ. ერთერთი ფუნქციონალი, რაც იმისთვის დავამატეთ, რომ პროცესი ყველასთვის გამარტივებულიყო, გახლავთ, რომ მაძიებლებისთვის CV-ის შექმნა და დაგენერერება არის შესაძლებელი.
ამ დრომდე, როგორ შეაფასებთ – გაამართლა აპლიკაციის იდეამ?
ყველაფერი წარმატებით მიმდინარეობს, რაზეც მეტყველებს ის, რომ გვყავს ათასზე მეტი დარეგისტრირებული ბიზნესი, მათ შორის, ბიზნესები, რომლებიც ყოველთვიურად იხდიან მომსახურების საფასურს. გარდა ამისა, სამუშაოს მაძიებლების რაოდენობა 80 000-ს გადასცდა. დიდი წილი, 95 % არის აპლიკაციის გადმომწერი. როგორც მინიმუმ, რა ინფორმაციასაც ვფლობთ ჩვენ, 5 000 ადამიანი დასაქმდა ჩვენი პლატფორმის გავლით, შესაძლოა, რიცხვი გაცილებით მეტი იყოს, უბრალოდ, დამსაქმებლები ყოველთვის არ გვიზიარებენ ინფორმაციას. პერიოდულად, გვაქვს გამოკითხვები და ასე ვიღებთ შესაბამის მონაცემებს. ვფიქრობთ, საერთაშორისო ბაზრისთვის გვაქვს აბსოლუტური მზაობა, რათა ძალიან მალე გავფართოვდეთ.
