ექიმი გიორგი ღოღობერიძე გადაცემაში “მთავარი დიაგნოზი” საუბრობს იმ მედიკამენტების შესახებ, რომელთა ხანგრძლივი დროის გამოყენების შემთხვევაში, შესაძლოა, მეხსიერება გაგიუარესდეთ:
– ძალიან ბევრმა ადამიანმა არ იცის, რომ მეხსიერების გაუარესება არა მარტო დაავადებებით, არამედ იმ მედიკამენტებითაც შეიძლება იყოს გამოწვეული, რომელთაც ყოველდღე სვამთ. მაგრამ, არ გიფიქრიათ, რომ ეს მედიკამენტი შესაძლოა, სწორედ რომ მეხსიერების გაუარესების მიზეზი იყოს. ზოგადად, მეხსიერების გაუარესება ნებისმიერ წამალს შეუძლია, როცა ის ხანგრძლივი დროითა და მაღალი დოზებითაა გამოყენებული. მაგრამ, არის გარკვეული მედიკამენტები, რომლებიც მეხსიერების გაუარესების განსაკუთრებული უნარით ხასიათდებიან, როცა მათ ხანგრძლივი დროის განმავლობაში იყენებენ. მაინც, რომელი მედიკამენტებია ესენი?
უპირობო ლიდერი ბენზოდიაზეპინებია – ეს არის ის მედიკამენტები, რომლებიც შფოთვების, აჟიტირების, კრუნჩხვების დროს გამოიყენება. ან კიდევ როცა საქმე ძილის პრობლემის მოგვარებას ეხება. როცა ადამიანს უძილობა აწუხებს, ამ ჯგუფის მედიკამენტებს სვამს. ასეთი მედიკამენტები, როდესაც მას ხანგრძლივი დროის განმავლობაში ვიყენებთ, მეხსიერების გაუარესებას იწვევენ.
გარდა აღნიშნული მედიკამენტებისა, მეხსიერების გაუარესება შეიძლება, ანტიდეპრესანტებმაც გამოიწვიოს. საქართველოში ანტიდეპრესანტებს ძალიან ბევრი ადამიანი იღებს. ის დოზები და ის ხანგრძლივობა, რომელიც დანიშნულია, მეხსიერებაზე არ აისახება, მაგრამ თუ აღნიშნულ პრეპარატებს დიდი ხნის განმავლობაში იყენებთ, შეიძლება, მას მეხსიერების გაუარესება, საკმაოდ მძიმე ფორმებშიც კი მოჰყვეს.
კრუნჩხვების საწინააღმდეგოდ გამოყენებული მედიკამენტები ასევე შეიძლება, მეხსიერების გაუარესების უნარით ხასიათდებოდეს.
გარდა ამისა, საყურადღებოა ანტიჰისტამინური საშუალებები. აღნიშნული მედიკამენტები, როგორც წესი, გაციების საწინააღმდეგო ჩაიში, თავბრუსხვევის, ყურებში შუილის სამართავად, გულის რევისა და ღებინების დროს გამოიყენება. თუ ამ მედიკამენტებს ხანგრძლივი დროის განმავლობაში მიიღებთ, მეხსიერება შეიძლება, ნამდვილად გაუარესდეს.
მეხსიერების გაუარესება შეიძლება ისეთმა მედიკამენტებმაც გამოიწვიოს, რომლებიც შარდის ბუშტის მოსაწესრიგებლად გამოიყენება, როცა ადამიანს გახშირებული, ან კიდევ შარდის შეუკავებლობა აქვს.
გარდა ამისა, მეხსიერების გაუარესება შეიძლება, გამოწვეული იყოს სტეროიდებით, ანუ ჰორმონებით, როცა მათ ხანგრძლივი დროის განმავლობაში იყენებენ.
ბოლო პერიოდში გავრცელდა ინფორმაცია, რომ ქოლესტეროლის დასაქვეითებელი მედიკამენტებიც შეიძლება, მეხსიერების გაუარესებას იწვევდეს. თუმცა, ჯერჯერობით, მყარი მტკიცებულებები ამის შესახებ არ გვაქვს.
როგორც კი მედიკამენტის ხანგრძლივი დროის განმავლობაში გამოყენებას იწყებთ – საუბარია თვეებსა და წლებზე, მეხსიერების გაუარესებას რომ შენიშნავთ, წამალი თვითნებურად არ უნდა შეწყვიტოთ და ექიმს ყოველთვის აცნობეთ. გამოსავალი არსებობს. ექიმს შეუძლია, იმავე ჯგუფის სხვა მედიკამენტი დაგინიშნოთ, რომელიც მეხსიერების გაუარესებით არ ხასიათდება და ამ კუთხით, ძირითადი პრობლემაც მოგიგვარებთ და მეხსიერებასაც შეგინარჩუნებთ.
